اسلام آباد ہائیکورٹ کے چیف جسٹس عامر فاروق نے الیکشن ترمیمی ایکٹ کے خلاف پی ٹی آئی کے درخواست پر لارجر بینچ تشکیل دینے کا عندیہ دیدیا۔
الیکشن ترمیمی ایکٹ کے خلاف پی ٹی آئی کی درخواست پر اسلام آباد ہائیکورٹ کے چیف جسٹس عامر فاروق نے سماعت کی۔ عدالت نے اٹارنی جنرل کو نوٹس جاری کرکے معاونت کیلئے طلب کرلیا۔ وزارت قانون اور الیکشن کمیشن کو نوٹس جاری، 10 روز میں جواب طلب کرلیا گیا۔
وکیل پی ٹی آئی شعیب شاہین ایڈووکیٹ نے عدالت کو بتایا کہ الیکشن ایکٹ میں ترمیم کے بعد ریٹائرڈ جج ٹریبونل میں تعینات ہوسکتا ہے، ریٹائرڈ جج کی تعیناتی میں چیف جسٹس ہائیکورٹ سے مشاورت ختم کردی گئی، استدعا ہے کہ کیس پر لارجر یا ڈویژن بینچ تشکیل دیا جائے۔
اسلام آباد ہائیکورٹ کے چیف جسٹس عامر فاروق نے ریمارکس دیے کہ دوسرے فریق کا جواب آنے دیں پھر دیکھیں گے، لارجر بینچ بنا دوں گا، چیف جسٹس عامر فاروق نے کیس 10 روز بعد دوبارہ مقرر کرنے کی ہدایت کردی۔
