پاکستان پیپلز پارٹی نے بھی تحریک انصاف کو مخصوص نشستیں دینے کے فیصلے کے خلاف سپریم کورٹ میں نظرثانی درخواست دائر کردی۔
سپریم کورٹ میں پیپلز پارٹی کی طرف سے فاروق ایچ نائیک نے درخواست دائر کی جس میں موقف اختیار کیا گیا ہے کہ تحریک انصاف کو نشستیں بنا مانگے دی گئی ہیں۔ سپریم کورٹ نے مخصوص نشستیں تحریک انصاف کو دینے کے معاملہ پر باضابطہ نوٹس نہیں دیا۔
مؤقف اختیار کیا گیا ہے کہ سپریم کورٹ کا آرڈر اصل تنازع پر مکمل خاموش ہے، عدالت کا 12 جولائی کا آرڈر آئین کی تشریح کے طے شدہ اصول کے منافی ہے، عدالت سے بارہ جولائی کا فیصلہ واپس لینے کی استدعا کی گئی ہے۔ مسلم لیگ ن پہلے ہی مخصوص نشستوں کے فیصلہ پر پہلے ہی نظر ثانی درخواست دائر کر چکی ہے۔
خیال رہے کہ 12 جولائی کو سپریم کورٹ نے سنی اتحاد کونسل کی مخصوص نشستوں سے متعلق درخواست پر محفوظ فیصلہ سناتے ہوئے الیکشن کمیشن اور پشاور ہائیکورٹ کے فیصلے کو کالعدم قرار دیا تھا۔عدالت نے خواتین اور اقلیتوں کی مخصوص نشستیں پی ٹی آئی کو دینے کا حکم دیا ہے۔
