آئی سی سی مینز ٹی ٹوئنٹی ورلڈکپ 2024 کے گروپ اسٹیج ختم ہونے کے قریب ہے، اب تک ایونٹ میں بڑے اپ سیٹ بھی ہوئے اور مضبوط ٹیمیں ورلڈکپ سے باہر بھی ہوچکی ہیں۔
ٹی ٹوئنٹی ورلڈکپ 2024 میں 5،5 ٹیمیوں پر مشتمل 4 گروپ بنائے گئے جس میں پہلا مرحلہ ختم ہونے کے بعد ہر گروپ کی 2 ٹاپ ٹیمیں سپر 8 مرحلے میں کوالیفائی کریں گی جبکہ 12 ٹیموں کا سفر ایونٹ میں ختم ہوجائے گا۔ ٹی ٹوئنٹی ورلڈکپ میں اب تک 30 میچز کھیلے جاچکے ہیں اور 6 ٹیمیں سپر 8 مرحلے میں پہنچ چکی ہیں۔
ورلڈکپ کے گروپ اے میں بھارت اور میزبان امریکا سپر 8 مرحلے میں پہنچ چکا ہے جبکہ سابق عالمی چیمپئن پاکستان اس دوڑ سے باہر ہوگیا ہے۔ گروپ "بی" سے آسٹریلیا نے سپر 8 مرحلے کیلئے کوالیفائی کرلیا ہے جبکہ دوسری ٹیم کا فیصلہ ہونا باقی ہے۔
گروپ سی میں بڑا اپ سیٹ سامنے آیا، ویسٹ انڈیز اور افغانستان نے اگلے مرحلے کیلئے کوالیفائی کرلیا جبکہ ایونٹ کی فیورٹ قرار دی جانے والی نیوزی لینڈ کی ٹیم باہر ہوگئی۔ گروپ ڈی جنوبی افریقا نے سپر 8 مرحلے کیلئے کوالیفائی کرلیا ہے جبکہ دوسری ٹیم کا فیصلہ ہونا باقی ہے۔ اس گروپ میں بھی اپ سیٹ ہوا، سابق عالمی چیمپئن سری لنکا سپر 8 کی دوڑ سے باہر ہوگیا ہے۔
