اسلام آباد ہائی کورٹ نے خیبرپختونخوا سے 15 سال سے لاپتہ شہری کی بازیابی کی درخواست پر بڑا حکم دیدیا کہا حکومت اگلی سماعت سے قبل لاپتہ ہارون محمد کے والد کو 30 لاکھ روپے معاوضہ ادا کرے۔
اسلام آباد ہائی کورٹ کے جسٹس میاں گل حسن اورنگزیب نے جولائی 2009 سے لاپتہ ہارون محمد کی بازیابی سے متعلق درخواست پر سماعت کی۔ عدالت نے حکم دیا کہ وفاقی حکومت لاپتہ شہری کے والد کو 30 لاکھ معاوضہ ادا کرے۔
وکیل ایمان مزاری نے کہا کہ درخواست گزار کے اہلخانہ کو مقدمہ لڑنے پر دھمکیاں مل رہی ہیں۔ عدالت نے بذریعہ سیکرٹری داخلہ آئی جی خیبرپختونخوا کو ہدایت جاری کی کہ درخواست گزار کو سیکیورٹی فراہم کی جائے۔ سیکیورٹی اہلکاروں کے خلاف مقدمہ درج کرنے کا بھی حکم دے دیا۔ کیس کی مزید سماعت دو ہفتے بعد ہوگی۔
