امریکا نے سابق ایرانی صدر ابراہیم رئیسی کی وفات پر ایران سے تعزیت کا اظہار کیا ہے۔
امریکی اسٹیٹ ڈیپارٹمنٹ کے ترجمان میتھیو ملر نے ایک بیان میں کہا کہ ایرانی صدر ابراہیم رئیسی وزیر خارجہ حسین امیر عبداللہیان اور ان کے وفد کے دیگر ارکان کی وفات پر امریکا سرکاری سطح پر تعزیت کا اظہار کرتا ہے۔
میتھیو ملر کا بیان میں کہنا تھا کہ ایران نئے صدر کے انتخاب کی جانب بڑھ رہا ہے اور امریکا انسانی اور بنیادی حقوق کی جدوجہد میں ایرانی لوگوں کے ساتھ ہے۔
دوسری جانب امریکی وزیر دفاع نے کہا ہے کہ حادثے کے بعد کی صورتحال پر ہماری نظر ہے، حادثے کی وجوہات سے متعلق ہمارے پاس کوئی اطلاع نہیں ہے اور حقائق جاننے کے لیے ایرانی تحقیقات کا انتظار کریں گے۔
یاد رہے کہ ایران کے سابق صدر ابراہیم رئیسی اور وزیر خارجہ حسین امیر اتوار کو ہونے والے ہیلی کاپٹر حادثے کے نتیجے میں جان کی بازی ہار گئے ہیں جس کی تصدیق پیر کے روز کی گئی۔
ایرانی آئین کے مطابق نائب صدر محمد مخبر صدارت کے اختیارات سنبھالیں گے اور 50 دن کے اندر انتخابات کرائے جائیں گے۔
