ملک کی عسکری قیادت نے سانحہ 9 مئی پر ہونے والی مجرمانہ کارروائیوں کی شدید مذمت کی ہے۔
پاک فوج کے شعبہ تعلقات عامہ (آئی ایس پی آر) کے مطابق افواج، چیئرمین جوائنٹ چیفس آف اسٹاف کمیٹی اور سروسز چیفس نے سانحہ 9 مئی پر ہونے والی مجرمانہ کارروائیوں کی شدید مذمت کی ہے۔
ترجمان پاک فوج کے مطابق ہمارے شہداء اور ان کے خاندان پاکستان کا فخرہیں، پاکستان کی مسلح افواج اپنے وقار اور عزت کو ہر قیمت پر برقرار رکھنے کا عہد کرتی ہیں۔ پاکستان کی مسلح افواج کا پاکستانی عوام کے ساتھ بہت خاص رشتہ ہے۔
انتشاری ٹولے سے بات چیت نہیں ہوسکتی، پاک فوج کا دو ٹوک اعلان
آئی ایس پی آر کے مطابق 9 مئی کو برین واشڈ شرپسندوں نے بغاوت کی اور جان بوجھ کر ریاستی اداروں کے خلاف تشدد کا سہارا لیا، ان شرپسندعناصر نے جان بوجھ کر ریاست کی مقدس علامتوں اور قومی ورثے سے تعلق رکھنے والے مقامات کی توڑ پھوڑ کی۔ ان کا مقصد ملک میں خود ساختہ اور تنگ نظر انقلاب لانے کی ناکام کوشش تھی۔
ترجمان پاک فوج کے مطابق مسلح افواج نے تحمل کا مظاہرہ کرتے ہوئے تخریب کاروں اور ان کے منصوبہ سازوں کی سازش کو ناکام بنا دیا، ان شر پسند عناصر کا بنیادی مقصد عوام اور افواج کے درمیان تصادم کو ہوا دے کر پاکستان کو غیر مستحکم کرنا تھا۔
آئی ایس پی آر کے مطابق آج مسلح افواج پاکستان کی خودمختاری اور علاقائی سالمیت کا دفاع کا عزم دہراتی ہیں۔ یقینی بنانا ہوگا کہ مستقبل میں کوئی ہیروز اور اتحاد کی علامتوں کی بے حرمتی کی جرات نہ کرے۔ ترجمان نے کہا کہ سانحہ کے منصوبہ سازوں، سہولت کاروں کے ساتھ کوئی سمجھوتہ ہو سکتا ہے نہ ہی انہیں قانون کی دھجیاں اڑانے کی اجازت دی جائے گی۔
