بھارتی لیجنڈری اداکار دھرمیندر نے پاکستانی اداکار و میزبان احسن خان کے نام ایک ویڈیو پیغام بھیجا ہے جس میں انہوں نے احسن خان اور ان کے اہل خانہ کے لیے نیک تمناؤں کا اظہار کیا۔
1960 میں فلمی کیریئر کا آغاز کرنے سے لے کر آج تک اپنی اداکاری کے جوہر دکھانے والے لیجنڈری اداکار دھرمیندر نے اس ویڈیو پیغام میں احسن خان کی تعریفیں کرتے ہوئے ان کے لیے نیک خواہشات کا اظہار کر رہے ہیں اور پاکستانیوں کو اپنا بھی کہہ رہے ہیں۔
بھارتی لیجنڈری اداکار نے اس ویڈیو پیغام میں مزید کہا کہ آپ سب میرے اپنے ہیں، کبھی غیر نہیں سمجھا، آرٹسٹ تو جذباتی ہی ہوتے ہیں۔
بھارت کے متعدد صدارتی ایوارڈ حاصل کرنے والے اداکار دھرمیندر دیول نے ناصرف اداکار احسن خان بلکہ ان کے اہل خانہ اور دوستوں کے لیے بھی نیک تمناؤں کا اظہار کرتے ہوئے کہا کہ میں دعا کرتا ہوں کہ تمھاری مقبولیت اور بڑھے، میری طرف سے آپ کے اور آپ کے اہل خانہ کے لیے بہت پیار اور ڈھیروں دعائیں۔
بھارتی اداکار دھرمیندر کی جانب سے تعریفی پیغام موصول ہونے پر اداکار احسن خان نے اس ویڈیو پیغام کو اپنے سوشل میڈیا کے پلیٹ فارم انسٹاگرام اکاؤنٹ پر شیئر کرتے ہوئے کیپشن میں لکھا کہ دھرمیندر جی آپ بہت مہربان ہیں ان محبتوں کا شکریہ، فلم شعلے میں ویرو کا کردار ہمیشہ میرے پسندیدہ کرداروں میں سے ایک رہے گا۔
صارفین نے اس پوسٹ کے کمنٹس میں احسن خان کو خوش قسمت قرار دیا کہ لیجنڈری اداکار دھرمیندر نے ان کی تعریف کی ہے جبکہ بعض نے دھرمیندر کی تعریف بھی کی کہ انہوں نے پاکستانی فنکار کے لیے محبت اور دعاؤں سے بھرپور پیغام بھیجا۔
View this post on Instagram
یاد رہے کہ ماضی کی بھارتی اداکارہ ممتاز کی پاکستان آمد پر احسن خان نے اپنی رہائش گاہ پر ان کے اعزاز میں چھوٹی سی تقریب رکھی تھی جس میں اداکارہ ریشم، گلوکار شفقت امانت علی خان اور دیگر شخصیات نے شرکت کی تھی۔
