الیکشن کمیشن آف پاکستان نے ریٹرننگ افسر کو امیدواروں اور پولنگ ایجنٹ کی موجودگی میں دوبارہ فارم 47 مرتب کرنے کی ہدایت کردی۔
تفصیلات کے مطابق الیکشن کمشین میں پرویز الہیٰ اور قیصرہ الٰہی کی درخواستوں پر سماعت ہوگئی، ممبر سندھ نثار درانی کی سربراہی میں 3 رکنی بینچ نے سماعت کی، قیصرہ الہی اور پر ویز الٰہی کے وکلا الیکشن کمیشن میں پیش ہوگئے۔
وکیل پرویز الہیٰ نے عدالت کو بتایا کہ فارم 47 آر او نے ہماری عدم موجودگی میں تیار کیا، امیدوار قیصرہ الہیٰ کو ایک لاکھ 36 ہزار ووٹ ملے، فارم 45 کے تحت ہم جیتے،فارم 47 میں مخالف کو جتوا دیا گیا۔
ممبر الیکشن کمیشن نے وکیل کو کہا کہ درخواست میں جائیں وہاں ہم دیکھتے ہیں، وکیل درخواست گزار نے کہا کہ سیکشن 8 کے تحت تمام اختیارات آپ کے پاس ہیں، سیکشن 92 کے تحت ہماری موجودگی میں فارم 47 تیار کریں۔ ممبر کمیشن نے کہا کہ آپ کے پاس راستے کھولے ہیں، ہم ہدایات نہیں دیں گے۔
ممبر کے پی نے استفسار کیا کہ مجھے بھی سمجھا دیں کہ ہمارے اختیارات کیا ہیں؟ پ کتاب کھولیں اور متعلقہ سکشن پڑھیں۔ ممبر بلوچستان نے کہا کہ متعلقہ حلقوں کا فارم 47 تو جاری بھی ہوچکا ہے، وکیل درخواست گزار نے کہا کہ حلقے کے 247 پولنگ اسٹیشنز پر ہماری برتری تھی۔ قیصرہ الٰہی این اے 64 اور پرویز الہیٰ پی پی 32 سے امیدوار تھے۔
الیکشن کمیشن نے پی پی 32 اور این اے 64 سے متعلق دونوں درخواستیں منظور کرتے ہوئے حلقوں کے مخالف امیدواروں کو نوٹس جاری کردیا جبکہ امیدواروں اور پولنگ ایجنٹ کی موجودگی میں دوبارہ فارم 47 مرتب کرنے کی ہدایت کردی۔
