پیٹرن انچیف استحکام پاکستان پارٹی (آئی پی پی) جہانگیرترین کا کہنا ہے کہ اللہ تعالیٰ عقاب اور ن لیگ کی جوڑی کو کامیاب کرے۔ انشااللہ ہماری حکومت بنے گی اور نوازشریف ہمارے لیڈرہوں گے۔
ملتان این اے149 میں آئی پی پی ورکرز کنونشن سے خطاب میں جہانگیرترین نے کہا کہ سب نے ملکرملکی معیشت کیلئے کام کرناہے،8فروری کے بعد معیشت کو چمکائیں گے۔ ہم سب نے پاکستان کے لیے مل کر بہتری کرنی ہے۔ ہم کامیاب ہوں گے تو معیشت ترقی کرے گی۔
جہانگیرترین کا کہنا تھا کہ لاکھوں کی تعداد میں نوکری دیں گے، اللہ تعالیٰ نے مجھے بہت کچھ دیا ہے، جتنامیں نے لوگوں پرخرچ کیا ہے، اللہ نے مجھے اس سے دگنا دیا ہے، ہمیں کامیاب ہونے کے لیے آپ کی دعاؤں کی ضرورت ہے۔ کامیاب ہوکر عوام کی امید پر پورا اتروں گا۔
