وفاقی وزیر پارلیمانی امورطارق فضل چوہدری نے ایکس پر پیغام کرتے ہوئے کہا کہ پی ٹی آئی کا آزاد کشمیر الیکشن سے فرار کا فیصلہ کسی اصولی سیاست کا نہیں بلکہ سیاسی کمزوری، عوامی حمایت سے خوف اورانتخابی میدان سے فرار کا واضح ثبوت ہے۔
تفصیلات کے مطابق طارق فضل چوہدری کا کہناتھا کہ خود کو بڑی نمائندہ قرار دینے والی جماعت عوام کے فیصلے سے بچنے کےلیے جواز تراش رہی ہے، اگر واقعی عوام کے حقوق اور جمہوریت پر یقین ہوتا تو میدان چھوڑنے کے بجائے عوام کے پاس جاتے، ووٹ لیتے اور اپنی بات بیلٹ کے ذریعے منواتے، انتخاب کو متنازع بنانا،اداروں پرالزامات لگانا،انتخابی عمل سےکنارہ کشی کرنا ناکام سیاسی حکمتِ عملی بن چکی ہے۔
انہوں نے کہا کہ جمہوریت میں احتجاج کا حق موجود ہے، تحفظات بھی اٹھائے جا سکتے ہیں، لیکن عوام سے ووٹ مانگنے کے بجائے انتخابی عمل کا بائیکاٹ کرنا دراصل عوام کے حقِ رائے دہی کی توہین ہے، سیاسی جماعتیں عوام کے فیصلوں سے بھاگتی نہیں بلکہ ان کا سامنا کرتی ہیں۔
ان کا کہناتھا کہ حقیقت یہ ہے کہ انتخابات سے فرار کسی اصول کی علامت نہیں بلکہ عوامی اعتماد سے محرومی کا اعتراف ہوتا ہے، آزاد جموں و کشمیر کے عوام جذباتی نعروں کے بجائے عملی قیادت، ذمہ دار سیاست اور جمہوری عمل پر یقین رکھتے ہیں، اور وہ بخوبی جانتے ہیں کہ عوامی مینڈیٹ کا راستہ صرف بیلٹ باکس سے گزرتا ہے، بائیکاٹ اور سیاسی ڈراموں سے نہیں۔
یاد رہے کہ چیئرمین پی ٹی آئی بیرسٹر گوہر نے کچھ دیر قبل بیان جاری کرتے ہوئے آزاد کشمیر کے انتخابات سے بائیکاٹ کا اعلان کیا تھا ۔ان کا کہناتھا کہ فیصلہ پی ٹی آئی کی قیادت اوراتحادیوں کے مشورے کے ساتھ کیا ، فیصلہ آزاد کشمیرکی عوام کےخواہشات اورجذبات کے پیش نظر کیا، الیکشن جمہوریت کا پروسیس ہے ، عوام ووٹ سے اپنے نمائندوں کا انتخاب کرتا ہے، لیکن حالات برعکس ہیں ، اُمید ہے پی ٹی آئی آزاد کشمیر سے جوڑے تمام لوگ اس فیصلے کو سپورٹ کرینگے، اُمید دلاتے ہیں ہم ہر فیصلہ بانی پی ٹی آئی کے نظریئے کے مطابق کرتے ہیں۔
