ایرانی وزارت خارجہ نے بیان جاری کرتے ہوئے کہاہے کہ امریکی نمائندوں کا قطر کا دورہ ایران سے متعلق نہیں،دوحا میں امریکا کے ساتھ بات چیت کا امکان نہیں ہے۔
ایرانی وزارت خارجہ کا کہناتھا کہ فی الحال حتمی معاہدے پر بات چیت شروع نہیں ہوئی،مذاکرات کے لیے ایم او یوکی بعض شقوں پرعملدرآمد ضروری ہے،ایرانی تکنیکی وفد اس ہفتے قطر کا دورہ کرے گا ،ایرانی وفد مفاہمتی یادداشت پرعمل درآمد پر بات کرےگا۔
قطر میں ایرانی سفارتخانے کا بیان
قطر میں ایرانی سفارتخانے کا کہناہے کہ اس حوالے سے کسی قسم کی تیاریاں شروع نہیں ہوئیں۔ امریکا کے ساتھ مجوزہ ملاقات یا مذاکرات کے بارے میں اب تک کوئی باضابطہ اطلاع موصول نہیں ہوئی۔
سفارت خانے کے بیان میں کہا گیا’’ابھی تک اس معاملے پر ہمیں کوئی سرکاری معلومات فراہم نہیں کی گئیں۔"
دوسری جانب ایرانی نائب وزیر خارجہ کاظم غریب آبادی نے کہا کہ قطر کے ساتھ مشاورت، خصوصاً دوسرے فریق کے وعدوں پر عملدرآمد کے حوالے سے، معمول کے مطابق جاری ہے، تاہم بعض میڈیا اداروں کی جانب سے دوحہ میں تکنیکی ورکنگ گروپس کے مذاکرات کی خبریں درست نہیں اور ان کی تصدیق نہیں کی جا سکتی۔
واضح رہے کہ اس سے قبل امریکی صدر ڈونلڈ ٹرمپ نے دعویٰ کیا تھا کہ ایران اور امریکا کے درمیان منگل کو قطر کے دارالحکومت دوحہ میں ملاقات ہوگی، تاہم ایرانی حکام نے اس دعوے کی تاحال تصدیق نہیں کی۔
