وینزویلا میں دو طاقتور زلزلوں کے نتیجے میں ہلاک ہونے والے افراد کی تعداد 920 تک پہنچ گئی جبکہ 4 ہزار سے زائد افراد زخمی ہیں۔ لاگوئیرا شہر میں سب سے زیادہ تباہی ہوئی ہے جہاں اکثر عمارتیں ملبے کا ڈھیر بن گئی ہیں۔
وینزویلا کے شمالی علاقوں میں آنے والے 2 شدید زلزلوں کے بعد امدادی ٹیمیں ملبے تلے دبے افراد کی تلاش میں مصروف ہیں۔ حکام نے خدشہ ظاہر کیا ہے کہ ہلاکتوں اور زخمیوں کی تعداد میں مزید اضافہ ہو سکتا ہے کیونکہ ہزاروں افراد تاحال لاپتا ہیں۔
رپورٹس کے مطابق 7.2 اور 7.5 شدت کے زلزلے بدھ کی شام آئے، جنہیں وینزویلا میں ایک صدی سے زائد عرصے کے دوران آنے والے طاقتور ترین زلزلوں میں شمار کیا جا رہا ہے۔ زلزلوں کے جھٹکے خطے کے دیگر علاقوں تک بھی محسوس کیے گئے۔
بھاری مشینری اور امدادی کارکن ملبہ ہٹانے میں مصروف ہیں، مقامی حکام کے مطابق ملبے تلے دبے افراد کی آوازیں سنائی دے رہی ہیں، میکسیکو نے امدادی سرگرمیوں کیلئے ریسکیو ٹیم بھیج دی۔ چلی سے بھی امدادی کارکنوں کا قافلہ روانہ کردیا گیا، برازیل کے صدر نے ہر ممکن امداد کی یقین دہانی کرادی۔
امریکا میں موجود وینزویلین تارکین وطن نے امدادی کیمپ لگا دیے، پاناما کے شہریوں نے امدادی سامان کے انبار لگا دیے۔
