کربلا میں حضرت امام حسین رضی اللہ تعالیٰ عنہ اور ان کے ساتھیوں کی جانب سے دی گئی عظیم قربانیوں کو خراجِ عقیدت پیش کرنے کے لئے ملک بھر میں یوم عاشور 10 محرم الحرام آج مذہبی عقیدت و احترام سے منایا جارہا ہے۔
واقعہ کربلا حق و باطل کے درمیان امتیاز کی علامت ہے ظلم اور بربریت کے خلاف اس کی مثال رہتی دنیا تک دی جاتی رہے گی۔ حضرت امام حسین رضی اللہ تعالیٰ عنہ اور ان کے رفقا کو خراج عقیدت پیش کیا جارہا ہے۔ آج ملک کے تمام چھوٹے بڑے شہروں میں شبیہ ذوالجناح کے جلوس نکالے جائیں گے۔
ملک بھر میں سیکیورٹی کے سخت ترین انتظامات کیے گئے ہیں۔ کراچی میں مرکزی جلوس نشتر پارک سے برآمد ہوکر روایتی راستوں سے ہوتا ہوا حسینیہ ایرانیاں امام بارگاہ کھارادر پر ختم ہوگا۔ کوئٹہ میں یومِ عاشور کا مرکزی جلوس شہداء چوک علمدار روڈ سے برآمد ہوگیا ۔ جو مقررہ راستوں سے ہوتا ہوا علمدار روڈ پر ہی اختتام پذیر ہوگا۔
راولپنڈی میں یوم عاشور کا مرکزی جلوس امام بارگاہ حفاظت علی شاہ تیلی محلہ سے برآمد ہو گا۔ جلوس روٹ کو سیل کر کے شرکا کے داخلہ کے لیے ایک راستہ مختص کردیا گیا ہے۔
لاہور میں یوم عاشور کا جلوس اپنے روایتی راستوں پر گامزن ہے۔ جلوس آج کربلا گامے شاہ پہنچ کر اختتام پذیر ہوگا۔ جلوس کے راستوں میں عزاداروں کے لیے سبیلیں اور نیاز کا اہتمام بھی کیا گیا ہے۔
فیصل آباد میں 10 محرم کا مرکزی جلوس عزاخانہ شبیر سے برآمد ہوگا ۔ ضلع بھر میں سینکڑوں مجالس اور جلوسوں کا انعقاد کیا جائے گا۔
ملتان میں عاشورہ کا مرکزی جلوس امام بارگاہ ہیرا حیدریہ سے برآمد ہوگیا جو کہ بعد نماز مغرب امام بارگاہ شاہ شمس تبریز پہنچ کر اختتام پذیر ہوگا۔
گوجرانوالہ
یوم عاشور کا مرکزی جلوس اختتام پذیر ہو گیا,، جلوس امام بارگاہ گلستان معرفت پہنچ کر اختتام پذیر ہوا، اس موقع پر سخت سیکیورٹی کے انتظامات کیئے گئے تھے۔
میلسی
عاستانہ خادم شاہ سےبرآمد ہونے والا یوم عاشورہ کا مرکزی جلوس دربارہ بابا نتھے شاہ پہنچ کراختتام پذیر ہو گیا۔ انجمن حسینہ سےبرآمد ہونے والا ذوالجناح کا جلوس اپنےروایتی راستوں سے ہوتا ہوا پرامن طور پر اختتام پذیر ہوا۔
ٹبہ سلطان پور، دوکوثہ، گڑھاموڑاورچک ڈںلیوبی سےبرآمد ہونے والے ماتمی جلوس اختتام پزیرہوگئے۔
کبیروالا
یومِ عاشور کا مرکزی جلوس امام بارگاہ زینبیہ بھٹیانوالہ میں پُرامن طور پر اختتام پذیر ہوگیا، مرکزی جلوس صبح8بجےککڑ ہٹہ روڈ سے برآمد ہوا اور اپنے مقررہ راستوں سے ہوتا ہوا اختتام پذیر ہوا، یومِ عاشورہ پر تحصیل بھر میں عزاداری کے 36 جلوس برآمد کیے گئے۔
چنیوٹ
مرکزی جلوس اپنے راستوں کی جانب رواں دواں ہے، 100 من وزنی 8 سنہری تعزیے مقررہ راستوں سے ہوتے ہوئے میدان ترکھاناں پہنچ گئے، 35 جلوس علم و ذوالجناح مرکزی جلوس میں شامل ہوکر میدان ترکھاناں پہنچے، 72 تابوتوں پر مشتمل رجوعہ کا مرکزی جلوس میدان کربلا پہنچ گیا ، رجوعہ کے جلوس میں 65 شبیہ علم اور 14 شبیہ ذوالجناح شامل ہیں، پولیس کی بھاری نفری تعینات کی گئی ہے جبکہ ڈرون کیمروں سے اجتماعات کی کڑی نگرانی جاری ہے۔
حیدرآباد
یوم عاشورکامرکزی ماتمی جلوس کربلا دادن شاہ پہنچ کراختتام پذیر ہوگیا، مرکزی ماتمی جلوس صبح قدم گاہ مولا علی سے برآمد ہوا تھا، جلوس میں ہزاروں عزادار شریک تھے۔
کشمور
یوم عاشور کے مرکزی جلوس کا سلسلہ جاری ہے جس کیلئے سخت سیکیورٹی انتظامات کیئے گئے ہیں، 10محرم کےموقع پرامام بارگاہ پیرفتح شاہ سے برآمد ہونے والا جلوس مقررہ راستوں پر گامزن ہے۔ مرکزی امام بارگاہ سے نکلنے والا مرکزی جلوس رات 8 بجے اختتام پذیر ہوگا، یوم عاشورکےپیشِ نظرضلع بھر میں سیکیورٹی کے فول پروف انتظامات کیے گئے ہیں۔
سمندری
یوم عاشور10محرم الحرام کا مرکزی جلوس چکی بازار سے برآمد ہو گیا، جلوس میں ذوالجناح، جھولا تازیہ اور دیگر زیارات رکھی گئی ہیں ، جلوس کے راستوں میں سکیورٹی کے سخت انتظامات کیے گئے ہیں ، پولیس، ریسکیو، وارڈنز، ستھرا پنجاب کے اہلکار موجود ہیں۔ جلوس کچہری بازار، گوجرہ رو سے ہو کر امام بارگاہ درعباس لر اختتام پذیر ہوگا ، امام بارگاہ کے باہر شام غریباں کا انعقاد کیا جائے گا۔
راولپنڈی
راولپنڈی میں 10ویں محرم الحرام کا مرکزی جلوس اپنےمقررہ راستوں پر رواں دواں ہے، علم،ذوالجناح اورتعزیے کا جلوس امام بارگاہ عاشق حسین تیلی محلہ سے برآمد ہوا، شہرکےمختلف علاقوں سے برآمد ہونے والےچھوٹے جلوس مرکزی جلوس کا حصہ بن گئے، اس وقت مرکزی جلوس فوارہ چوک پر موجود ہے،سیکیورٹی کے سخت انتظامات کیئے گئے ہیں، جلوس کیلئے سیکیورٹی کیلئے ساڑھے 5 ہزار پولیس اہلکار ڈیوٹی ڈیوٹی پر مامور ہیں، مرکزی کنٹرول اورسیف سٹی کیمروں کے ذریعے جلوس کی نگرانی جاری ہے، جلوس مقررہ روایتی راستوں ہوتا ہوا رات گئےامام بارگاہ قدیمی پراختتام پذیر ہوگا۔
