چیئرمین پاکستان علماء کونسل و کوارڈینیٹر وزیر اعظم و قومی پیغام امن کمیٹی حکومت پاکستان حافظ محمد طاہر محمود اشرفی نے کہا ہے کہ الحمدللہ ملک بھر میں محرم الحرام کے ایام امن و امان ، سلامتی اور رواداری کے ساتھ گزر رہے ہیں۔ الحمدللہ پورے ملک میں پیغام پاکستان ضابطہ اخلاق پر عمل ہو رہا ہے۔
چیئرمین پاکستان علماء کونسل نے کہا کہ سوشل میڈیا کے حوالے سے جو چند شکایات موصول ہوئی ہیں ان پر قانون کے مطابق کارروائی ہو رہی ہے ۔ کل جمعۃ المبارک کے خطبات اور مجالس ، کانفرنسیں پیغام سیدنا امام حسین رضی اللہ عنہ ، پیغام امن و سلامتی ، وحدت و اتحاداور رواداری کے عنوان پر ہوں گے۔
انہوں نے کہا کہ تمام مکاتب فکر کے علماء و مشائخ ، ذاکرین ، واعظین ، خطباء اور عوام الناس سے اپیل کی کہ وہ تحمل ، برداشت ، رواداری کا راستہ اپناتے ہوئے ایک دوسرے کے ساتھ مکمل تعاون کریںاور کسی بھی قسم کے شر پسند کو شرپسندی کا موقع نہ دیں۔ پولیس ، سلامتی کے اداروں سے مکمل تعاون کریں ، روٹ ، وقت کا خیال کریں اور باہمی مفاہمت ، رواداری اور محبت سے ذکر سیدنا امام حسین رضی اللہ عنہ کریں۔
حافظ طاہر اشرفی نے کہا کہ اگر کہیں پر کوئی مشکل پیش آتی ہے تو فوری طور پر مقامی انتظامیہ، مقامی پولیس اور امن کمیٹیوں کے ممبران کے ساتھ رابطہ رکھیں۔ انہوں نے کہا کہ قومی پیغامِ امن کمیٹی اور اس سے منسلک صوبائی امن کمیٹیاں، کمیٹیوں کے اراکین تمام مکاتبِ فکر کی قیادت سے رابطے میں ہیں۔
دوسری جانب متحدہ علماء بورڈ پنجاب کے وفد نے محکمہ داخلہ پنجاب کے مرکزی کنٹرول روم کا دورہ کیا، سیکرٹری داخلہ پنجاب ڈاکٹر احمد جاوید قاضی سے ملاقات اور محرم الحرام سکیورٹی انتظامات بارے تبادلہ خیال کیا۔
چیئرمین متحدہ علماء بورڈ پنجاب مفتی انتخاب احمد نوری کی قیادت میں تمام مکاتب فکر سے علماء کرام کی شرکت کیں، چیئرمین پاکستان علماء کونسل حافظ طاہر محمود اشرفی نے بھی خصوصی شرکت کی۔
سیکرٹری داخلہ پنجاب ڈاکٹر احمد جاوید قاضی نے کہا کہ حکومتِ پنجاب محرم الحرام کو پُرامن انداز میں گزارنے کیلئے ہر ممکن اقدامات اٹھا رہی ہے، پنجاب میں 37 ہزار سے زائد مجالس اور 9 ہزار سے زائد جلوسوں کی لائیو مانیٹرنگ کی جا رہی ہے۔
اس موقع پر چیئرمین متحدہ علماء بورڈ پنجاب مفتی انتخاب احمد نوری کا کہنا تھا کہ متحدہ علماء بورڈ اتحاد بین المسلمین کیلئے حکومت پنجاب کی کاوشوں کے ساتھ کھڑا ہے، تمام مکاتب فکر کے علماء کرام قیام امن اور باہمی وحدت کیلئے ریاست کے دست و بازو ہیں۔
چیئرمین پاکستان علماء کونسل حافظ طاہر محمود اشرفی نے کہا کہ محرم الحرام میں قیام امن کیلئے محکمہ داخلہ پنجاب اور قانون نافذ کرنے والے اداروں کو خراج تحسین پیش کرتے ہیں، علماء کرام قانون نافذ کرنے والے اداروں کے شانہ بشانہ قیامِ امن کیلئے کوشاں ہیں۔
