یومِ عاشور پر صدرِ مملکت آصف علی زرداری اور وزیرِ اعظم شہباز شریف کے الگ الگ پیغامات میں واقعۂ کربلا کو حق، عدل اور انسانی وقار کا دائمی پیغام قرار دیا۔ کہا بین المسالک ہم آہنگی، رواداری اور یکجہتی کو فروغ دینا وقت کی ضرورت ہے۔
صدرِ مملکت آصف علی زرداری نے اپنے پیغام میں کہا کہ یومِ عاشور اسلامی تاریخ کا ایک عظیم دن ہے۔ یہ دن ہمیں صبر، استقامت اور حق گوئی کا درس دیتا ہے۔
آصف علی زرداری نے کہا کہ نواسۂ رسول حضرت امام حسین رضی اللہ عنہ اور اہلِ بیتِ نے باطل کے سامنے سرِ جھکانے کے بجائے جانوں کا نذرانہ پیش کیا۔ جو امت کے لیے مشعل راہ ہے۔ صدرِ مملکت نے عوام پر زور دیا کہ وہ افواہوں اور اشتعال انگیز رویوں سے اجتناب کرتے ہوئے قومی وحدت کے لیے مثبت کردار ادا کریں۔
وزیرِ اعظم شہباز شریف نے بھی اپنا پیغام جاری کیا۔ کہا واقعۂ کربلا اصلاحِ امت، احیائے سنتِ نبوی اور امر بالمعروف و نہی عن المنکر کا عظیم مقصد ہے۔ امام عالی مقام کا طرزِ عمل ثابت کرتا ہے کہ اصولوں پر قربانی دینا ظلم کے سامنے جھکنے سے افضل ہے۔
وزیرِاعظم نے علمائے کرام، اور نوجوانوں سمیت پوری قوم سے اپیل کی کہ اختلافات اور انتشار کو رد کر کے باہمی احترام کو اپنائیں۔ معاشرے کے محروم طبقات کے حقوق کا تحفظ یقینی بناتے ہوئے متحد اور پرامن قوم کی تعمیر میں اپنا بھرپور کردار ادا کریں۔
