ایران کے صدر مسعود پزشکیان پاکستان کا ایک روزہ دورہ مکمل کرنے کے بعد واپس روانہ ہو گئے ہیں ۔
تفصیلات کے مطابق نائب وزیراعظم اسحاق ڈار اور فیلڈ مارشل سید عاصم منیر نے معزز مہمان مسعود پزشکیان کو نور خان ایئر بیس پر رخصت کیا ۔
یاد رہے کہ ایرانی صدر مسعود پزشکیان نے صدر مملکت آصف علی زرداری ، وزیراعظم پاکستان اور فیلڈ مارشل سید عاصم منیر سے الگ الگ ملاقاتیں کیں جس دوران دوطرفہ تعلقات، علاقائی امن و سلامتی، اقتصادی تعاون سمیت دیگر امور پر تبادلہ خیال کیا گیا ۔
ایرانی صدر مسعود پزشکیان نے پریس کانفرنس میں خطاب کے دوران پاکستان اور ایران کو یک جان دو قالب قرار دیا اور مذاکراتی عمل میں پاکستان کے کردار کی کھل کر تعریف کی ۔
انہوں نے کہا کہ پاکستان صرف ہمارا ہمسایہ ہی نہیں،بھائی اور عزیز دوست ہے،اسلام آباد،تہران کے تعلقات قریبی اعتماد اور باہمی احترام پر مبنی ہیں، اسلام آبادمفاہمتی یادداشت پر دستخط پاکستان پر اعتماد کی بدولت ممکن ہوئے۔
انہوں نے کہا کہ امن،ترقی اور خوشحالی کیلئے پاکستان کے اہم کردار کے معترف ہیں، مذاکراتی عمل میں پاکستان نے بہترین کردار ادا کیا، ماضی قریب کے واقعات نے دونوں ممالک کے قریبی رشتے کو نئی جہت دی، ماضی قریب میں ہونیوالے واقعات دونوں ممالک کے قریبی رشتے کے عکاس ہیں۔
ان کا کہناتھا کہ ملاقاتوں میں دوطرفہ تعلقات اور خطےکی صورتحال پر بات ہوئی، صدرمملکت،وزیراعظم اور فیلڈمارشل سے ملاقاتیں ہوئیں، دورہ پاکستان کیلئے دعوت دینے پر اپنے بھائی شہباز شریف کا مشکور ہوں، شاندار استقبال اور بھرپور میزبانی پر پاکستانی حکومت اور عوام کا مشکور ہوں۔
ایرانی صدر نے کہا کہ امن عمل کیلئے مصر کی قیادت اور دوست ممالک کے بھی شکر گزارہیں، امن عمل کیلئے قطر،ترکیہ،سعودی عرب کی قیادت کے مشکور ہیں، خطےمیں امن و پائیدار ترقی علاقائی روابط کے فروغ اور تعمیری گفتگو سے ممکن ہے، چیلنجز پر قابو پاتے ہوئے خوشحال مشترکہ مستقبل کیلئے آگے بڑھنا ہے۔
