اسلام آباد ایم او یو پر عملدرآمد کیلئے امریکا اور ایران کے درمیان سوئٹزرلینڈ کے سیاحتی ریزورٹ برگن اسٹاک میں مذاکرات کا پہلا دور مکمل ہوگیا۔
رپورٹ کے مطابق امریکا اور ایران کی اعلی سطح کی کمیٹیوں کے درمیان مذاکرات کا پہلا دور 45منٹ تک چلا۔
امریکی ٹی وی سی این این نے سفارتی ذرائع سے دعویٰ کیا ہے کہ مذاکرات کے پہلے راؤنڈ میں لبنان، آبنائے ہرمز اور ایرانی جوہری ذخائر پر بات ہوئی، مذاکرات میں 60 روزہ مذاکراتی دور کی ساخت پر بھی بات چیت ہوئی، فریقین کے درمیان واضح اور صاف گوئی کی ساتھ تبالہ خیال ہوا۔
قبل ازیں قطر کی وزارتِ خارجہ کی جانب سے جاری بیان میں کہا گیا ہے کہ اُمید ہے کہ اس مذاکراتی عمل کے آغاز سے مفاہمتی یادداشت میں طے پانے والے تمام نکات پر جامع اور مستقل معاہدہ طے پا جائے گا۔
بیان میں کہا گیا ہے کہ حتمی معاہدے تک پہنچنے کے لیے خصوصی تکنیکی ماہرین پر مشتمل گروپ تشکیل دیے گئے ہیں جو مفاہمتی یادداشت کے تمام نکات پر بات چیت کریں گے۔
دوسری جانب ترجمان ایرانی وزارت خارجہ نے کہا کہ برگن اسٹاک میں ہونیوالا اجلاس ایک روزہ اور لبنان میں جنگ بندی مذاکرات کا اہم ایجنڈا ہوگا۔
