الجزیرہ کے مطابق ایک سینئر اسرائیلی عہدیدار نے دعویٰ کیا ہے کہ اسرائیل نے امریکی صدر ڈونلڈ ٹرمپ کی درخواست پر ایران پر حملے روک دیے ہیں۔
اسرائیلی ذرائع ابلاغ کے مطابق چینل 12 نے ایک سینئر اسرائیلی عہدیدار کے حوالے سے رپورٹ کیا ہے کہ امریکا کی درخواست کے بعد ایران کے خلاف کارروائیاں روک دی گئی ہیں۔
رپورٹ کے مطابق عہدیدار نے مزید کہا کہ اگر لبنان کی تنظیم حزب اللہ کی جانب سے اسرائیلی شہروں پر حملے جاری رہے تو اسرائیل بیروت کے جنوبی مضافاتی علاقوں کو نشانہ بنائے گا۔
سینئر اسرائیلی عہدیدار کے مطابق جنوبی لبنان میں اسرائیلی کارروائیاں آئندہ چند روز کے دوران پوری شدت کے ساتھ جاری رہیں گی۔
تاہم اس رپورٹ کی آزاد ذرائع سے تصدیق نہیں ہو سکی۔
یاد رہے کہ گزشتہ شب اسرائیل کے لبنان پر حملے کے بعد ایران کی جانب سے اسرائیل پر میزائل داغے گئے جس کے جواب میں اسرائیل نے ایک مرتبہ پھر ایران پر حملہ کیا ، ایران نے بھی اسرائیل کیخلاف جوابی کارروائی کی ۔
گزشتہ شب امریکی صدر ڈونلڈ ٹرمپ نے دونوں ممالک سے حملے روکنے کا مطالبہ کیا تھا ۔
خبر ایجنسی کے مطابق امریکی صدر اور نیتن یاہو کے درمیان ایک اور ٹیلیفونک رابطہ ہوا ، سوشل میڈیا پر پیغام سے پہلے صدر ٹرمپ نے نیتن یاہو سے بات کی۔
اسرائیلی میڈیا کے مطابق اسرائیل نے صدر ٹرمپ کی درخواست پر حملے بند کیے، صدر ٹرمپ نے کہا تھا ایران اور اسرائیل دونوں جنگ بندی چاہتے ہیں۔
