وفاقی وزیر داخلہ محسن نقوی تہران پہنچ گئے ہیں جہاں ایئر پورٹ پر ایرانی ہم منصب سکندر مومنی نے استقبال کیا ۔
تفصیلات کے مطابق محسن نقوی کاا ستقبال کرنے والوں میں ایران کیلئے پاکستان کے نئے سفیر عمران صدیقی بھی ایئر پورٹ پر موجود تھے ۔وزیر داخلہ محسن نقوی اور ایرانی ہم منصب اسکندر مومنی میں باضابطہ ملاقات بھی ہوئی۔
وزیر داخلہ محسن نقوی ایران کے صدر مسعود پزشکیان سے بھی ملاقات کریں گے جبکہ ایرانی اسپیکر اور سیکرٹری سپریم نیشنل سلامتی کونسل سے بھی ملاقاتوں کا امکان ہے۔
مشرق وسطیٰ میں پائیدار امن کے لئے جاری کوششیں مزید تیزکر دی گئیں۔ ذرائع کے مطابق محسن نقوی فیلڈ مارشل سید عاصم منیر کا خصوصی پیغام ایرانی سپریم لیڈر تک پہنچائیں گے۔ فیلڈ مارشل کا ایرانی سپریم لیڈر کیلئے پیغام پائیدار امن کےحوالے سے اہم ہے ۔
ایران کے دورہ پر روانگی سے قبل محسن نقوی کی وزیراعظم سے ملاقات
ترجمان وزیراعظم ہاؤس کے مطابق محسن نقوی کی وزیراعظم شہباز شریف سے لاہور میں ملاقات ہوئی جس دوران وزیرداخلہ نے وزیراعظم کو بشکیک میں شنگھائی تعاون کانفرنس سے آگاہ کیا۔
محسن نقوی نے وزیراعظم کو مختلف رہنمائوں کے ساتھ ملاقاتوں سے بھی آگاہ کیا، ملاقات میں وزیراعظم اور وزیر داخلہ کی آئندہ دورہ تہران پر بھی مشاورت ہوئی، وزیراعظم شہبازشریف نے محسن نقوی کو دورے سے متعلق رہنمائی فراہم کی۔
ملاقات میں ملک کی مجموعی امن و امان اور سیکیورٹی صورتحال پر بھی تفصیلی تبادلہ خیال کیا گیا، وزیرداخلہ نے وزیراعظم کو ملک میں امن و امان کیلئے کئے گئے اقدامات پر بریفنگ دی ، وزیراعظم نے ملک میں امن و امان کے قیام اور سیکیورٹی مزید مؤثر بنانے پر زور دیا اور کہا کہ متعلقہ اداروں میں قریبی رابطے اور مربوط حکمت عملی کی ضرورت ہے۔
