پنجاب ،بلوچستان ، خیبرپختونخوا ، گلگت بلتستان اور کشمیر میں 19 سے 22 مئی تک آندھی ، بارش اور ژالہ باری کی پیش گوئی کر دی گئی، سندھ بھر میں موسم خشک رہنے کے ساتھ گرمی کی شدت میں مزید اضافے کا امکان ہے۔
نیشنل ڈیزاسٹر مینجمنٹ اتھارٹی نے انیس سے بائیس مئی کے دوران ملک بھر کے لیے نیا موسمی الرٹ جاری کر دیا ۔ ترجمان کے مطابق پنجاب، خیبرپختونخوا، بلوچستان اور شمالی علاقہ جات میں تیز ہواؤں اور گرج چمک کے ساتھ بارش اور ژالہ باری کا امکان ہے۔ گلگت بلتستان اور آزاد کشمیر میں بھی بادل برسیں گے۔ البتہ سندھ بھر میں موسم شدید گرم اور خشک رہے گا۔ این ڈی ایم اے نے عوام کو شدید گرمی یا تیز بارش کے دوران غیر ضروری سفر سے گریز کی ہدایت کی ہے ۔ یہ بھی کہا کہ آندھی کے دوران کمزور تنصیبات، سولر پینلز اور بجلی کے کھمبوں سے دور رہیں۔ شہریوں سے مقامی انتظامیہ کے ساتھ تعاون کرنے کی اپیل بھی کی گئی ہے۔
