حکومت نے اعلی سرکاری افسران کے اثاثے دسمبر 2026 تک ڈیکلئر کرنے کا فیصلہ کر لیا۔ افسران کی خفیہ معلومات اور اثاثوں کی تفصیلات عوام کیلئے دستیاب ہونگی۔ منی لانڈرنگ اور مشکوک مالی سرگرمیوں کی نگرانی کیلئے افسران کے اثاثہ جات تک بینکوں کی رسائی مزید بڑھائی جائے گی۔ چیئرمین نیب کی تقرری شفاف بنا کر ادارے کی سالانہ کارکردگی رپورٹ شائع بھی کی جائے گی۔
سرکاری افسران کے اثاثے کتنے؟ کس نے کتنا مال بنایا؟ حکومت نے خفیہ معلومات اور اثاثوں کی تفصیلات پبلک کرنے کا فیصلہ کرلیا۔ عوام کو تمام معلومات آن لائن دستیاب ہوں گی۔
ایسٹس ڈیکلریشن کا نظام وضع کرنے کیلئے دسمبر 2026 کی ڈیڈ لائن مقرر کردی گئی، منی لانڈرنگ اور مشکوک مالی سرگرمیوں کی بہتر نگرانی شروع کی جا چکی، دستاویز کے مطابق اعلیٰ سرکاری افسران کے اثاثہ جات تک بینکوں کی رسائی مزید بڑھا دی گئی ہے۔
اثاثہ جات کی معلومات مرکزی ڈیجیٹل نظام کے ذریعے جمع ہوں گی۔ جون 2026 تک ایف بی آر اعدادوشمار اپنی ویب سائٹ پر جاری کرے گا۔ بینکوں نے کتنی بار اثاثہ معلومات تک رسائی حاصل کی، پتہ چل سکے گا۔
جولائی 2026 تک اثاثہ جات جمع کرانے کے لیے ڈیجیٹل پلیٹ فارم بنایا جائے گا، اکتوبر 2026 تک کرپشن رسک اسسمنٹ کا طریقہ کار تیار کیا جائے گا، اس کا مقصد سرکاری اداروں میں بدعنوانی کے خطرات کم کرنا ہے۔
حکومت نے کرپشن کیخلاف سرگرم ادارے مضبوط بنانے کی بھی یقین دہانی کروا دی۔ قومی احتساب بیورو کے چیئرمین کی تقرری کا عمل مزید شفاف بنانے کا فیصلہ کرلیا گیا۔ آئی ایم ایف کو بتایا گیا قانون میں ترمیم پارلیمنٹ میں پیش کی جائے گی۔
نیب کی تحقیقات، مقدمات کے قواعد اور سالانہ کارکردگی رپورٹ شائع کی جائے گی۔ صوبائی سطح پر انٹی کرپشن اداروں کی کارکردگی بہتر بنائی جائے گی تاکہ مالی بدعنوانی سے متعلق خطرات پر قابو پایا جاسکے۔
