امریکی صدر ڈونلڈ ٹرمپ نے پراجیکٹ فریڈم دوبارہ بڑے پیمانے پر شروع کرنے کی پھر دھمکی دیدی۔
فاکس نیوز سے گفتگو میں ڈونلڈ ٹرمپ نے کہا کہ ایران کے ساتھ جنگ بندی وینٹی لیٹر پر ہے۔ ایران امریکا سے اتفاق کرتا ہے اور پھر پیچھے ہٹ جاتا ہے ۔ ان کا جواب پسند نہیں آیا۔ ایران میں سخت گیر قیادت کو جھکنے پر مجبور کروں گا۔
ڈونلڈ ٹرمپ کے مطابق تہران نے خط میں جوہری ہتھیار نہ بنانے کا ذکر نہیں کیا۔ ایٹمی مواد کو ہمارے حوالے کرنے کا ارادہ رکھتا ہے لیکن ان کے پاس جوہری مواد کو ملبے سے نکالنے کی ٹیکنالوجی نہیں ۔ یہ معاملہ مزید مذاکرات کیلئے چھوڑ رہے ہیں۔
دوسری جانب امریکی صدر ڈونلڈ ٹرمپ کا نیشنل سیکیورٹی ٹیم کے ساتھ اجلاس ہوا۔ امریکی خبررساں ادارے ایگزیوس کی رپورٹ کے مطابق اجلاس میں ایران کے خلاف ممکنہ فوجی کارروائی بھی زیر غور آئی۔
رپورٹ کے مطابق صدر ٹرمپ ڈیل کرنا چاہتے ہیں لیکن ایران امریکا کو رعایت دینے کیلئے تیار نہیں اور صدر ٹرمپ دباؤ بڑھانے کیلئے ایران کے خلاف کارروائی چاہتے ہیں۔
رپورٹ میں دعویٰ کیا گیا کہ صدر ٹرمپ چین کے دورے سے پہلے ایران کے خلاف کارروائی کا حکم نہیں دے سکتے۔ اس لیے ممکنہ امریکی ردعمل دورہ چین کے بعد آ سکتا ہے۔
ایگزیوس کے مطابق حالیہ مذاکرات کسی نتیجے پر نہ پہنچنے کے بعد واشنگٹن میں یہ تاثر مضبوط ہوا ہے کہ ایران جوہری پروگرام کے معاملے پر خاطر خواہ لچک دکھانے کے لیے تیار نہیں۔ اسی تناظر میں امریکی انتظامیہ دباؤ بڑھانے کے نئے طریقوں پر غور کر رہی ہے۔
