نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں بارشوں، گلیشیائی جھیلوں کے پھٹنے (گلاف) اور شدید گرمی کی لہر کے حوالے سے الرٹ جاری کر دیا۔
این ڈی ایم اے کے مطابق آئندہ 24 گھنٹوں کے دوران اسلام آباد، پنجاب، خیبرپختونخوا، آزاد کشمیر اور گلگت بلتستان میں بارش اور ژالہ باری کا امکان ہے، جبکہ گلگت بلتستان اور آزاد کشمیر کے مختلف علاقوں میں گرج چمک کے ساتھ بارشیں متوقع ہیں۔
ادارے نے خبردار کیا ہے کہ 11 سے 17 مئی 2026 کے دوران شمالی علاقوں میں گلیشیائی جھیلیں پھٹنے کے واقعات پیش آ سکتے ہیں، جس کے باعث مقامی آبادی اور سیاحوں کو احتیاط برتنے کی ہدایت کی گئی ہے۔
دوسری جانب این ڈی ایم اے نے کل سے 18 مئی تک ملک کے مختلف علاقوں میں ہیٹ ویو الرٹ بھی جاری کیا ہے۔ جنوبی اور وسطیٰ علاقوں میں 3 سے 5 روز تک شدید گرمی برقرار رہنے کا امکان ظاہر کیا گیا ہے۔
این ڈی ایم اے کے مطابق زیریں سندھ، جنوبی پنجاب اور مشرقی بلوچستان شدید گرمی سے زیادہ متاثر ہو سکتے ہیں، جبکہ کراچی اور سندھ کے دیگر مختلف علاقے بھی شدید گرمی کی لپیٹ میں آ سکتے ہیں۔ بلوچستان کے متعدد اضلاع میں بھی درجہ حرارت میں غیر معمولی اضافے کی پیشگوئی کی گئی ہے۔
ادارے نے خبردار کیا ہے کہ ہیٹ ویو کے باعث ہیٹ اسٹروک اور دیگر طبی مسائل میں اضافے کا خدشہ ہے، جبکہ بجلی کی طلب بڑھنے اور پانی کی قلت پیدا ہونے کا بھی امکان ہے۔
این ڈی ایم اے نے متعلقہ اداروں کو ہیٹ ویو پلان فعال رکھنے، کولنگ سینٹرز قائم کرنے اور شہریوں کو پانی کی فراہمی یقینی بنانے کی ہدایت جاری کر دی ہے۔
