وفاقی آئینی عدالت نے انکم ٹیکس قانون کا سیکشن ای سیون کالعدم قرار دیتے ہوئے ایف بی آر کی تمام اپیلیں خارج اور اس حوالے سے اقدامات غیرمؤثر قرار دے دئیے۔
وفاقی آئینی عدالت نے انکم ٹیکس قانون کے سیکشن ای سیون کو کالعدم قرار دیتے ہوئے اس سے متعلق تمام قانونی اقدامات کو بھی غیر مؤثر قرار دے دیا ہے۔ چیف جسٹس آئینی عدالت امین الدین خان نے مختصر فیصلہ پڑھ کر سنایا۔ عدالت نے سیکشن ای سیون کی بحالی کیلئے دائر ایف بی آر کی اپیلیں بھی خارج کر دیں۔
فیصلے کے مطابق سیکشن ای سوین کے تحت ایف بی آر کی جانب سے کیے گئے تمام اقدامات کالعدم قرار پائے ہیں جبکہ اس شق کے تحت ایسے پلاٹس پر بھی ٹیکس عائد کیا گیا تھا جو زیر استعمال نہیں تھے۔ عدالت نے اس کیس کا فیصلہ 23 اپریل کو محفوظ کیا تھا۔
وفاقی آئینی عدالت کے فیصلے سے رئیل اسٹیٹ سیکٹر کو براہ راست فائدہ پہنچنے کی توقع ظاہر کی جا رہی ہے۔عدالت نے سندھ اور لاہور ہائیکورٹ کے فیصلوں کے خلاف شہریوں کی اپیلیں منظور کر لیں جبکہ اسلام آباد، بلوچستان اور پشاور ہائیکورٹ کے فیصلوں کے خلاف ایف بی آر کی اپیلیں خارج کر دی گئیں۔
یاد رہے کہ پشاور، بلوچستان اور اسلام آباد ہائیکورٹس نے سیکشن ای سیون کو کالعدم قرار دیا تھا جبکہ سندھ اور لاہور ہائیکورٹس نے اسے آئین کے مطابق قرار دیا تھا۔
