ترجمان ایرانی فوج کا کہنا ہے کہ آبنائے ہرمز میں جہاز رانی ایرانی افواج کی اجازت سے ہوگی، امریکی بحریہ کو خبردار کرتے ہیں، آبنائے ہرمز کے قریب نہ آئیں۔
ایرانی افوج کی مشترکہ کمان خاتم الانبیا ہیڈکوارٹرز کے ترجمان نے پریس کانفرنس کے دوران کہا کہ آبنائے ہرمز کی سکیورٹی مکمل طور پر ہمارے کنٹرول میں ہے، تجارتی جہاز اور ٹینکرز بغیر اجازت نقل وحرکت سے گریز کریں۔
ترجمان کا مزید کہنا تھا کہ ایرانی حدود میں کسی بھی خطرے کا سخت جواب دیا جائے گا، جارحانہ کارروائیاں موجودہ صورتحال کو مزید پیچیدہ کریں گی، ایسے اقدامات خلیج میں جہازوں کی سلامتی کو خطرے میں ڈالیں گے۔
قبل ازیں ایران نے خبردار کردیا ہے کہ آبنائے ہرمز کے نئے بحری نظام پر کسی بھی امریکی مداخلت کو سیزفائر کی خلاف ورزی سمجھا جائے گا۔
سربراہ ایرانی نیشنل سیکیورٹی کمیٹی ابراہیم عزیزی کا کہنا ہے کہ آبنائے ہرمز اور خلیج فارس کا انتظام غیر سنجیدہ یا غیر حقیقی بیانات سے نہیں چلایا جاسکتا، کسی بھی قسم کی الزام تراشی یا پروپیگنڈا قبول نہیں کریں گے۔
خیال رہے کہ گزشتہ روز ایران کی پارلیمنٹ کے نائب سپیکر علی نیکزاد کا کہنا ہے کہ پارلیمان سے ایک ایسا قانون منظور کروانے کی کوشش کی جا رہی ہے، جس کے تحت امریکی اور اسرائیلی جہازوں کو آبنائے ہرمز سے گزرنے کی اجازت نہیں ہوگی۔
