وفاقی وزیر مواصلات عبدالعلیم خان نے برادر ملک ترکیہ کے دو اسکولوں میں فائرنگ کے ہلاکت خیز واقعات کی مذمت اور قیمتی جانوں کے ضیاع پر افسوس کا اظہار کیا ہے۔
وفاقی وزیر مواصلات عبدالعلیم خان اسلام آباد میں ترک سفارتخانے پہنچے ۔ ترک سفیر ڈاکٹر عرفان نیزیراوغلو سے ملاقات کی اور ترکیہ کے دو صوبوں کے اسکولوں میں فائرنگ کے واقعات کی شدید مذمت کی۔ قیمتی جانی نقصان پر افسوس کا اظہار کیا۔
عبدالعلیم خان نے کہا کہ پاکستانی قوم دکھ کی اس گھڑی میں ترک بھائیوں کے ساتھ ہے۔ دونوں رہنماؤں نے اتفاق کیا کہ ایسے واقعات کی روک تھام کیلئے مضبوط خاندانی نظام انتہائی اہمیت کا حامل ہے۔
ترکیہ میں دو روز کے دوران دو صوبوں کے دو اسکولوں میں فائرنگ کے افسوسناک واقعات پیش آئے۔ نو عمر طلبا کی فائرنگ میں 16 سے زائد قیمتی جانیں ضائع اور درجنوں افراد زخمی ہوئے تھے۔
ترکیہ کے سفیر ڈاکٹر نیزیر اوغلو نے وفاقی وزیر عبدالعلیم خان کی آمد پر اظہار تشکرکیا اور امن کے قیام کے لئے پاکستان کا فیصلہ کن مثبت کردار لائق تحسین قرار دیا۔ ملاقات میں خطے کی موجودہ صورتحال، درپیش چیلنجز اور پاک ترکیہ کاوشوں پر بھی تفصیلی بات چیت ہوئی۔
