چیئرمین پی ٹی آئی بیرسٹر گوہر نے دعویٰ کیا ہے کہ بشریٰ بی بی کو اسپتال منتقل کیا گیا ہے۔
سماء سے گفتگو میں چئیرمین تحریک انصاف بیرسٹر گوہر نے کہا کہ بشریٰ بی بی کو گزشتہ رات اسپتال لایا گیا تھا، بشریٰ بی بی کو آنکھ کے علاج کے لیے اسپتال لایا گیا۔
چیئرمین پی ٹی آئی نے کہا کہ مزید تفصیلات معلوم کرنے کی کوشش کررہا ہوں، تفصیلات ملنے کے بعد کچھ بتانے کے پوزیشن میں ہوں گا۔
واضح رہے کہ دو روز قبل ماہر ڈاکٹروں پر مشتمل 3 رکنی ٹیم کی اڈیالہ جیل میں بشریٰ بی بی کی آنکھوں کا تفصیلی طبی معائنہ کیا تھا۔
میڈیکل ٹیم میں الشفا آئی ٹرسٹ اسپتال کے ڈاکٹر ندیم قریشی، پمز کے ڈاکٹر محمد عارف اور ہولی فیملی اسپتال کے ڈاکٹر آفاق شامل تھے۔ ذرائع کے مطابق بشریٰ بی بی نے آنکھوں کے مسائل سے متعلق شکایت کی تھی جس کے بعد تفصیلی معائنہ کیا گیا۔
طبی معائنہ جیل اسپتال میں تقریباً دو گھنٹے تک جاری رہا جبکہ میڈیکل ٹیم جدید آلات بھی ساتھ لائی تھی تاکہ نظر اور آنکھوں کی مکمل جانچ کی جا سکے۔
