وفاقی وزارت داخلہ کے ماتحت محکموں میں پانچ سال کے دوران بھرتیوں کی تفصیلات پارلیمان میں پیش کردی گئی۔ تقریباً ساڑھے 7 ہزار مجموعی بھرتیوں میں سب سے زیادہ ایف سی بلوچستان میں ہوئیں۔ اسلام آباد پولیس میں پانچ سال کے دوران صرف تریپن افراد کو ہی نوکری دی گئی۔
پارلیمان میں پیش کی گئی تفصیل کے مطابق پانچ سال کے دوران وفاقی وزارت داخلہ کے ماتحت محکموں میں کل 7 ہزار 463 بھرتیاں کی گئیں ۔ ایف سی بلوچستان (شمالی) میں 4 ہزار 958 اور ایف سی جنوبی میں 984 اہلکار بھرتی ہوئے ۔
نادرا نے پانچ سال کے دوران 1ایک ہزار 79 ملازمین بھرتی کئے ۔ انسداد منشیات ونگ میں 29 اور کوسٹ گارڈ میں 250 اہلکار بھرتی ہوئے ۔ ایف آئی اے نے پانچ سال کے دوران 100 افسران و اہلکار بھرتی کئے ۔ اسلام آباد میں بھرتی کئے گئے 53 کانسٹیبلز میں دو خواتین بھی شامل ہیں۔
