وفاقی وزیر خزانہ محمد اورنگزیب نے گلف نیوز کو انٹرویو دیتے ہوئے کہا کہ حکومتی اصلاحات کی بدولت معیشت میں استحکام آیا،عالمی سطح پر پاکستان کو پذیرائی ملی ہے،حکومت سرکاری اخراجات کم کرنے پر کام کر رہی ہے۔
تفصیلات کے مطابق محمد اورنگزیب نے کہا کہ نجکاری اور ادارہ جاتی اصلاحات پر بھی کام جاری ہے، پاکستان کی معیشت نے تاریخی بہتری حاصل کی ہے، پہلی بار بڑا سرپلس ریکارڈ ہوا، مہنگائی میں نمایاں کمی آئی ہے، ملکی معیشت کی شرح نمو میں اضافہ ہوا ہے، ملکی زرمبادلہ ذخائر 20 ارب ڈالر سے تجاوز کر چکے ہیں، اسٹاک مارکیٹ میں تقریباً 40 فیصد اضافہ سرمایہ کاروں کے اعتماد کا عکاس ہے۔
وزیر خزانہ نے کہا کہ حکومت کا مقصد صرف قلیل مدتی بہتری نہیں بلکہ دیرپا معاشی استحکام ہے،مستقبل میں معیشت کو نجی شعبے کے ذریعے مستحکم کیا جائے گا، پاکستان برآمدات اور سرمایہ کاری پر مبنی معاشی ماڈل کی طرف بڑھ رہا ہے،متحدہ عرب امارات کے ساتھ اقتصادی تعاون میں اضافہ ہو رہا ہے،ترسیلات زر میں نمایاں بہتری آئی،آئی ٹی، معدنیات، تیل و گیس میں سرمایہ کاری کے مواقع ہیں،معیشت کے دیگر شعبوں میں بھی سرمایہ کاری کے وسیع مواقع موجود ہیں۔
