کراچی میں ایف آئی اے امیگریشن نے جناح انٹرنیشنل ایئرپورٹ پر کارروائی کرتے ہوئے بیرون ملک سے ڈی پورٹ ہو کر آنے والے 6 ملزمان کو گرفتار کر لیا۔
حکام کے مطابق ملزمان کو جرمنی ، ترکیہ اور عراق سے پاکستان پہنچنے پر حراست میں لیا گیا۔ راشد نامی ملزم کو اوور اسٹے کے الزام میں عراق سے ایمرجنسی پاسپورٹ پر ڈی پورٹ کیا گیا جبکہ اس کے ذاتی پاسپورٹ کے 19 صفحات غائب پائے گئے۔
اسی طرح قبرص کے ٹرانزٹ ویزے پر ترکی میں 8 ماہ تک غیر قانونی قیام کرنے والے ملزم عاطف کو بھی گرفتار کر لیا گیا۔
ایف آئی اے کے مطابق یورپ میں غیر قانونی داخلے کی کوشش میں ملوث صدام، رخسار اور حماد رفیق کو بھی وطن واپسی پر حراست میں لیا گیا۔
ابتدائی تحقیقات میں انکشاف ہوا کہ ملزمان انسانی اسمگلرز کی مدد سے ایران کے راستے غیر قانونی طور پر یورپ جانے کی کوشش کر رہے تھے۔
ادھر اٹلی میں غیر قانونی داخلے پر اطالوی حکام نے عمیر خان نامی شخص کو بھی ڈی پورٹ کر دیا، جس نے پاکستان سے ایران اور ترکی کے راستے غیر قانونی سفر کیا تھا۔
