پاکستان اور آسٹریلیا کے درمیان ٹیسٹ سیریز کے حوالے سے آسٹریلوی سلیکٹرز کا ٹیم کے انتخاب کے لیے اجلاس رواں ہفتے ہوگا۔
آسٹریلوی میڈیا کے مطابق آسٹریلوی سلیکٹرز پاکستان کے خلاف سیریز کے لیے اسکواڈ کا انتخاب رواں ہفتے کریں گے۔
یاد رہے کہ آسٹریلیا اور پاکستان کے درمیان پہلا ٹیسسٹ 14 دسمبر سے پرتھ میں شروع ہو گا۔
آسٹریلوی ٹیم کے کپتان پیٹ کمنز کا کہنا ہے کہ پاکستان کے خلاف سیریز کے لئے ٹیم کا انتخاب ابھی نہیں ہوا ، شیفلڈ شیلڈ کے اس راؤنڈ کے بعد ہو گا۔
پیٹ کمنز نے کہا کہ ڈیوڈ وارنر تینوں فارمیٹ میں ہمارے ایک عظیم کرکٹر ہیں ، اگر وہ آخری ٹیسٹ ہوم گراونڈ پر کھیلتے ہیں تو وہ اچھے الوادع کے حقدار ہیں ، ٹیم کے انتخاب میں ہمیشہ پرفارمنس کو اہمیت دی جاتی ہے اور حالیہ ورلڈ کپ میں ڈیوڈ وارنر نے اچھی فارم کا مظاہرہ کیا ہے۔
خیال رہے کہ ڈیوڈ وارنر نے پاکستان کے خلاف سڈنی ٹیسٹ کو آخری ٹیسٹ ہونے کا اشارہ دیا تھا جبکہ آسٹریلوی میڈیا میں ڈیوڈ وارنر کے پاکستان کے خلاف الوداعی ٹیسٹ کھیلنے کی بحث ہو رہی ہے۔
