وزیر خزانہ محمد اورنگزیب نے آئی ایم ایف مشن سے ملاقات کی جس کا اعلامیہ جاری کر دیا گیاہے ۔ آئی ایم ایف مشن کی قیادت ایوا پیٹرووا نے کی۔
اعلامیے میں کہا گیا ہے کہ پاکستان کے ایکسٹینڈڈ فنڈ فیسیلٹی (EFF) پروگرام کے تیسرے اور ریزیلینس اینڈ سسٹین ایبلٹی فیسیلٹی (RSF) پروگرام کے دوسرے جائزے کا آغاز ہو گیا ہے۔
وزیر خزانہ محمد اورنگزیب نے اس عزم کا اعادہ کیا کہ معاشی استحکام کے لیے اصلاحات کا سلسلہ جاری رکھا جائے گا۔ مذاکرات میں ٹیکس اور توانائی کے شعبوں میں بڑی اصلاحات پر زور دیا گیا۔ وزیر خزانہ نے کہا کہ ٹیکس نظام کو مؤثر بنانے کے لیے نئی پالیسی آفس کو فعال کر دیا گیا ہے۔
وزیر خزانہ نے نجکاری اور سرکاری اداروں کی اصلاحات جاری رکھنے کا اعلان کرتے ہوئے کہا کہ حکومت کا سائز کم کرنے اور ادارے ضم کرنے کا عمل جاری ہے، برآمدات بڑھانے اور درآمدی انحصار کم کرنے کی حکمت عملی پر کام جاری ہے۔
مذاکرات میں سیلاب چیلنجز سے نمٹنے کیلئے حکومتی اقدامات پر بریفنگ دی گئی، وزیرخزانہ کی بات چیت میں عالمی حالات اور تیل قیمتوں میں اتارچڑھاؤ پر تشویش کا اظہار کیا گیا۔
انہوں نے کہا کہ معاشی بحالی کے آثار، مگر عالمی خطرات برقرار ہیں۔ حکومت نے کمزور طبقات کیلئے سماجی اخراجات جاری رکھنےکے عزم کا اظہار کیا ۔
وزارت خزانہ کے مطابق آئندہ دنوں میں آئی ایم ایف سے مزید ورچوئل مذاکرات ہوں گے۔
