ایران کی جانب سے اسرائیلی اور امریکی اہداف پر نئے میزائل حملوں کا سلسلہ جاری ہے۔
اسرائیلی میڈیا کے مطابق اسرائیل کے زیر قبضہ علاقے بیت شیمیش میں ایرانی میزائل گر گیا، میزائل حملے میں 11 اسرائیلی شہری ہلاک جبکہ 27 زخمی ہوگئے۔ میزائل لگنے کے بعد گاڑیوں میں آگ بھڑک اٹھی۔
تل ابیب، حیفا اور دیگر علاقوں میں عسکری تنصیبات پر حملے کیے گئے۔ شمالی اسرائیل میں میزائل گرنے سے خاتون ہلاک ہوگئی، 121 سے زائد افراد زخمی ہوگئے۔ اسرائیل بھر میں ایمرجنسی نافذ، شہری شہری بنکرز میں چھپ گئے۔ تعلیمی ادارے بند۔ فضائی آپریشن معطل ہے۔
دوسری جانب اسرائیلی فوج نے ایران کے تبریز ایئرپورٹ پر دو طیارے تباہ کرنے کا دعویٰ کیا ہے، بیان میں کہا گیا ہے کہ ایف فور اور ایف فائیو طیاروں کو پرواز کی طیاری کے دوران نشانہ بنایا گیا۔ اسرائیلی فوج نے طیاروں کو نشانہ بنانے کی ویڈیو بھی جاری کردی۔
خیال رہے کہ ایران کے سپریم لیڈر آیت اللہ خامنہ ای امریکی اور اسرائیلی مشترکہ حملے میں شہید ہوگئے۔ ایرانی سرکاری میڈیا کے مطابق ہفتہ کی صبح ان کے رہائشی کمپاؤنڈ پر فضائی حملہ کیا گیا جس کے بعد ان کی شہادت کی تصدیق کی گئی۔ وہ 86 برس کے تھے۔
ایرانی میڈیا کے مطابق خامنہ ای کی شہادت کے بعد حکومت نے 40 روزہ سرکاری سوگ کا اعلان کر دیا ہے جبکہ 7 روزہ عام تعطیلات کا بھی اعلان کیا گیا ہے۔
واضح رہے کہ اس سے قبل سرکاری میڈیا نے بتایا تھا کہ حملوں میں خامنہ ای کی بیٹی، داماد اور پوتا بھی شہید ہوگئے ہیں۔ اسلامی انقلابی گارڈ کور سے وابستہ فارس نیوز ایجنسی کے مطابق خامنہ ای کی ایک بہو بھی حملے میں شہید ہوئیں۔
ایران کے مجمع تشخیص مصلحت نظام کے ترجمان محسن دہنوی نے اعلان کیا ہے کہ آیت اللہ علی رضا اعرافی کو عبوری قیادت کونسل میں مجلس خبرگانِ رہبری کے فقہی رکن کے طور پر منتخب کر لیا گیا ہے۔
آیت اللہ علی خامنہ ای کی شہادت کے بعد ایرانی آئین کے آرٹیکل 111 کے تحت صدر، عدلیہ کے سربراہ اور نگہبان شوریٰ کے ایک فقیہ پر مشتمل عارضی قیادت کونسل رہبرِ اعلیٰ کی ذمہ داریاں سنبھالتی ہے۔ اگر ان میں سے کوئی معذرت کرے تو مجمع تشخیص مصلحت نظام نیا رکن نامزد کرتی ہے۔
