اٹلی نے لیگل مائیگریشن کے فروغ کےلیے پاکستان کی اسکلڈ لیبر فورس کیلئے ورک ویزے جاری کرنے کا اعلان کر دیا۔
وفاقی وزیر داخلہ محسن نقوی کی اٹلی کے ہم منصب میٹیو پینٹے ڈوسی سے ملاقات ہوئی، پاکستان اور اٹلی کےدرمیان داخلی سیکیورٹی تعلقات، غیرقانونی امیگریشن روک تھام اقدامات کا جائزہ لیا گیا۔
ملاقات میں انسداد منشیات و انسانی اسمگلنگ اور دہشتگردی کے خلاف تعاون مزید موثر بنانے پر تبادلہ خیال کیا گیا، دونوں وزرائے داخلہ نے غیر قانونی امیگریشن و انسانی سمگلنگ کی روک تھام کے لیے اقدامات کو سراہا۔ وزیر داخلہ محسن نقوی نے غیرقانونی امیگریشن کی روک تھام کیلئے حکومت پاکستان کے موثراقدامات سے آگاہ کیا
محسن نقوی نے کہا کہ ایئرپورٹس اور سمندری سرحدوں پر کڑی نگرانی سےغیرقانونی امیگریشن میں نمایاں کمی ہوئی ہے، اطالوی وزیرداخلہ نےغیرقانونی امیگریشن روک تھام کیلئےپاکستانی وزارت داخلہ کی موثرپالیسی کی تعریف کی۔
اطالوی وزیر داخلہ نے کہا کہ غیرقانونی امیگریشن،انسانی اسمگلنگ،منشیات روک تھام کیلئےپاکستانی اداروں کی کامیابیاں قابل تحسین ہیں، لیگل مائیگریشن کے فروغ کیلئے باہمی تعاون بڑھائیں گے، پاکستان کےساتھ مشترکہ مفادات کے شعبوں میں تعاون بڑھانے کیلئے تیار ہیں۔
میٹیو پینٹے ڈوسی نے کہا کہ لیگل مائیگریشن کےفروغ کیلئے10500 پاکستانی اسکلڈ لیبرفورس کوورک ویزےجاری کیےجائیں گے، وزیرداخلہ محسن نقوی کے مطالبے پر پاکستانی ڈپلومیٹک پاسپورٹ رکھنے والوں کواٹلی ویزا سے استثنیٰ ہو گا۔
