لاہور کے علاقے اچھرہ میں دکاندار کی جانب سے مبینہ طور پر 20 کلو سونا خود برد کرنے کے مقدمے میں اہم پیش رفت سامنے آئی ہے۔ ماڈل ٹاؤن کچہری کی عدالت نے گرفتار ملزم وسیم اختر کو 14 روزہ جوڈیشل ریمانڈ پر جیل بھیجنے کا حکم دے دیا۔
کیس کی سماعت جوڈیشل مجسٹریٹ احمد سعید نے پولیس کی درخواست پر کی۔ تفتیشی افسر نے مؤقف اختیار کیا کہ ملزم سے تفتیش مکمل ہو چکی ہے، لہٰذا اسے جوڈیشل ریمانڈ پر جیل بھیجا جائے۔ عدالت نے استدعا منظور کرتے ہوئے 14 روزہ جوڈیشل ریمانڈ دے دیا۔
پولیس کے مطابق ملزم کو 5 روزہ جسمانی ریمانڈ مکمل ہونے کے بعد عدالت میں پیش کیا گیا۔ مدعی مقدمہ کی جانب سے فیصل باجوہ ایڈووکیٹ پیش ہوئے۔
مدعی کے وکیل کا دعویٰ ہے کہ پولیس نے ملزم سے تقریباً 2 کلو سونا اور 2 کروڑ 67 لاکھ روپے برآمد کیے ہیں۔
تھانہ اچھرہ پولیس نے مختلف مدعیوں کی درخواستوں پر مقدمات درج کر رکھے ہیں جبکہ کیس کی مزید تحقیقات جاری ہیں۔
