واشنگٹن میں وزیرِاعظم شہباز شریف کی امریکی وزیرِ خارجہ مارکو روبیو سے ملاقات ہوئی ہے، غزہ امن بورڈ اجلاس کے موقع پر دوطرفہ تعلقات، امن منصوبے اور دہشت گردی کے خلاف تعاون پر تفصیلی تبادلہ خیال کیا گیا۔
واشنگٹن میں ہونے والی ملاقات میں نائب وزیرِاعظم اور وزیرِ خارجہ اسحاق ڈار بھی شریک تھے۔ وزیرِاعظم شہباز شریف نے امریکی صدر اور وزیرِ خارجہ مارکو روبیو کو غزہ امن بورڈ کے افتتاحی اجلاس پر مبارکباد دی اور غزہ امن منصوبے پر عملدرآمد کے لیے پاکستان کے تعاون کے عزم کا اعادہ کیا۔ملاقات کے دوران پاکستان اور امریکا کے اسٹریٹیجک تعلقات کی اہمیت پر زور دیا گیا اور شراکت داری پر اطمینان کا اظہار کیا گیا۔
دونوں رہنماؤں نے دوطرفہ تجارت اور معاشی سرگرمیوں میں اضافے، جبکہ دہشت گردی کے خلاف تعاون کو مزید مضبوط بنانے پر اتفاق کیا۔گفتگو میں بدلتی ہوئی عالمی صورتحال کے تناظر میں اعلیٰ سطح روابط کی اہمیت اجاگر کی گئی اور مشترکہ اہداف کے حصول کے لیے قریبی تعاون جاری رکھنے کے عزم کا اعادہ کیا گیا۔
