وزیراعظم شہباز شریف ورلڈ اکنامک فورم کے چھپنویں سالانہ اجلاس میں شرکت کے لیے سوئٹزرلینڈ پہنچ گئے۔ عالمی اجلاس کے دوران وزیراعظم کی اہم عالمی رہنماؤں سے ملاقاتیں بھی متوقع ہیں۔
زیورخ ایئرپورٹ پر پاکستان کے مستقل نمائندے برائے اقوام متحدہ محمد بلال، سوئٹزرلینڈ میں پاکستان کے سفیر مرغوب سلیم اور سفارتی عملے نے وزیراعظم کا استقبال کیا۔ نائب وزیراعظم و وزیر خارجہ اسحاق ڈار، وفاقی وزیر اقتصادی امور احد چیمہ، وزیر خزانہ محمد اورنگزیب، وزیر اطلاعات عطا اللہ تارڑ اور معاون خصوصی طارق فاطمی بھی وزیراعظم کے ساتھ ہیں۔
وزیراعظم شہباز شریف ورلڈ اکنامک فورم کے مختلف سیشنز میں شرکت کریں گے، جہاں وہ پاکستان کی معاشی اصلاحات، بہتر ہوتے معاشی اشاریوں اور استحکام کی حکمت عملی پر روشنی ڈالیں گے۔ اس موقع پر وزیراعظم عالمی رہنماؤں سے ملاقاتیں بھی کریں گے۔ شہباز شریف، پاکستان کی میزبانی اور ورلڈ اکنامک فورم کی شراکت سے منعقد ہونے والی بزنس راؤنڈ ٹیبل میں بھی شرکت کریں گے، جہاں سرمایہ کاری کے مواقع اور معاشی تعاون پر بات چیت ہو گی۔ وزیراعظم پاکستان کے ٹرپل او پروگرام، یعنی آرڈر، آپرچونیٹی اور آپٹیمائزیشن پر بھی اظہارِ خیال کریں گے۔
