وزیراعظم کا کہنا ہے کہ غریبوں کے استحصال کا رائج نظام حکومت نے شفاف نظام میں تبدیل کر دیا، شہباز شریف نے تمام متعلقہ اداروں کو عوام کے لیے مفید پیکج کی سفارشات مرتب کرنے کی ہدایت کردی۔
وزیراعظم شہباز شریف کی زیر صدارت اجلاس میں وفاقی حکومت کے مجوزہ رمضان پیکج اور گزشتہ سال کے رمضان پیکج کی تھرڈ پارٹی ویلیڈیشن کا جائزہ لیا گیا۔
شہباز شریف نے گزشتہ سال کے رمضان پیکج کی شفافیت پر مستند آڈٹ ادارے کی رپورٹ کو سراہا اور کہا کہ پیکج کی بدولت عوام کو ارزاں نرخوں پر اشیائے خورونوش فراہم کرنے کا مؤثر نظام قائم ہوا ہے، جس نے غریبوں کے استحصال کے رائج نظام کو شفاف بنایا۔
وزیراعظم نے ہدایت کی کہ تمام متعلقہ ادارے زیادہ مؤثر اور سودمند پیکج اور سفارشات مرتب کریں۔ عوام کو امدادی رقوم ڈیجیٹل والٹس کے ذریعے فراہمی، کیش لیس معیشت کے حصول میں سنگ میل ثابت ہوگی اور اس میں اسٹیٹ بینک آف پاکستان کی شمولیت سے مزید فروغ ملے گا۔ مؤثر نگرانی کے لیے ڈیجیٹل ڈیش بورڈ اور منظم مانیٹرنگ کا نظام بھی وضع کیا جائے گا جبکہ عوام کی عزت و تکریم ہمیشہ برقرار رکھی جائے گی۔
