وزیر داخلہ محسن نقوی نے غیرقانونی امیگریشن میں ملوث مافیا، بھکاری مافیا اور سرپرستوں کیخلاف مؤثر کریک ڈاؤن کا حکم دیدیا۔
اسلام آباد میں وفاقی وزیر داخلہ محسن نقوی کی زیر صدارت اجلاس میں ایف آئی اے امیگریشن ونگ کی کارکردگی کا تفصیلی جائزہ لیا گیا۔ اجلاس میں غیرقانونی امیگریشن، انسانی اسمگلنگ اور پیشہ ور بھکاری مافیا کے خلاف جاری مہم پر غور کیا گیا۔
وزیر داخلہ نے غیرقانونی امیگریشن میں ملوث مافیا کے خلاف بلا امتیاز کارروائیاں جاری رکھنے اور انسانی اسمگلنگ میں ملوث عناصر کو کسی رعایت کا مستحق نہ قرار دینے کی ہدایت کی۔
محسن نقوی نے کہا کہ پاکستان کے نام پر کسی صورت حرف آنے کی اجازت نہیں دی جا سکتی۔ وزیر داخلہ نے ایف آئی اے کو امیگریشن قوانین پر مؤثر عملدرآمد، ایئرپورٹس پر امیگریشن چیکنگ کے نظام کو مزید مضبوط بنانے اور سفری دستاویزات کی سخت اسکریننگ یقینی بنانے کی ہدایت کی۔ اجلاس میں وفاقی سیکرٹری داخلہ، ایڈیشنل سیکرٹری داخلہ، ڈی جی ایف آئی اے اور دیگر اعلیٰ حکام نے شرکت کی۔
