2025 میں پاکستانی انٹرنیٹ صارفین نے گوگل پر سب سے زیادہ کیا تلاش کیا؟ گوگل نے سالانہ رپورٹ جاری کردی۔
گوگل رپورٹ 2025 میں پاکستانیوں کی سرچ ترجیحات اوردلچسپیاں سامنے آ گئیں۔رپورٹ کےمطابق پاکستانی صارفین نے مختلف شعبوں سے تعلق رکھنے والی شخصیات میں غیر معمولی دلچسپی ظاہر کی ہے، تاہم اس سال کے ٹرینڈز میں ایک دلچسپ اور حیران کن حقیقت یہ سامنے آئی ہے کہ ایتھلیٹس کی فہرست میں سرحد پار سے تعلق رکھنے والے بھارتی کرکٹر ابھشیک شرما سب سے زیادہ سرچ کیے جانے والے کھلاڑی بن کر ابھرے ہیں۔
مقامی کرکٹ کے حوالے سے بھی انٹرنیٹ صارفین کافی متحرک رہے اور انہوں نے حسن نواز، عرفان خان نیازی، صاحبزادہ فرحان، محمد عباس اور صائم ایوب جیسے ابھرتے ہوئے ستاروں کے بارے میں معلومات حاصل کرنے میں گہری دلچسپی دکھائی۔
اعداد و شمار کے مطابق سال 2025 میں بانی پی ٹی آئی عمران خان سب سے زیادہ سرچ کی جانے والی پاکستانی شخصیت رہے،جس سے ظاہر ہوتا ہے کہ سیاسی منظر نامہ اب بھی عوام کی توجہ کا مرکز ہے۔
سیاسی شخصیات کےبعدجس نام نے انٹرنیٹ پر سب سے زیادہ دھوم مچائی وہ سابق فاسٹ بولر شعیب اختر اورمعروف گلوکار عاطف اسلم ہیں،جو اپنی اپنی فیلڈز میں عوامی مقبولیت کے لحاظ سے نمایاں پوزیشن پر رہے۔
شوبزانڈسٹری کےحوالے سے بھی پاکستانی صارفین کےذوق میں کوئی کمی دیکھنے میں نہیں آئی۔ رپورٹ کےمطابق رواں برس اداکارہ ماہرہ خان، اقرا عزیز اور ہانیہ عامر انٹرنیٹ پر سب سے زیادہ مقبول رہیں اور ان کی نجی و پیشہ ورانہ زندگی صارفین کے لیے مرکزِ نگاہ بنی رہی۔
مرد اداکاروں میں فہد مصطفیٰ اور وہاج علی بھی سرچ ٹرینڈز میں سرفہرست رہے،جبکہ دانش تیمور اپنے حالیہ ڈرامہ سیریل ’شیر‘ کی غیر معمولی کامیابی کی وجہ سے خبروں اور سرچ انجن پر چھائے رہے۔ گوگل کے یہ ٹرینڈز ثابت کرتے ہیں کہ پاکستانی صارفین کھیل، سیاست اور ڈرامہ انڈسٹری کے ہر چھوٹے بڑے واقعے پر گہری نظر رکھتے ہیں۔
یہ اعداد و شمار نہ صرف عوامی پسند کی عکاسی کرتے ہیں بلکہ آنے والے سال کے لیے نئے اسٹارز کی مقبولیت کا اشارہ بھی دیتے ہیں۔
