متحدہ عرب امارات کے صدر اور وزیراعظم شہبازشریف کے درمیان ملاقات ہوئی جس دوران نائب وزیراعظم اسحاق ڈار اور چیف آف ڈیفنس فورسز فیلڈ مارشل عاصم منیر بھی شریک تھے، ملاقات میں پاکستان اور متحدہ عرب امارات کے برادرانہ تعلقات مزید مضبوط بنانے پر اتفاق اور دوطرفہ تعاون کے جاری منصوبوں کا جائزہ لیا گیا۔
تفصیلات کے مطابق ملاقات میں سرمایہ کاری،توانائی، انفرا اسٹرکچر اور آئی ٹی تعاون بڑھانے پر زور دیا گیا جبکہ پاکستان اور یو اے ای کے درمیان تجارتی حجم بڑھانے پر ، عوامی روابط اور ٹیکنالوجی کے شعبے میں شراکت داری وسعت دینے کا فیصلہ کیا گیا ۔
وزیراعظم اور صدر یو اے ای نے علاقائی وعالمی صورتحال پر تبادلہ خیال کیا جبکہ باہمی دلچسپی کے امور پر قریبی رابطہ برقرار رکھنے کے عزم کا اعادہ کیا۔ ملاقات میں امن،استحکام اور پائیدار ترقی کے مشترکہ اہداف پر اتفاق کیا گیا ۔
وزیراعظم شہباز شریف کی دعوت پر صدر متحدہ عرب امارات محمدبن زیدالنہیان آج دوپہر پاکستان پہنچے ، وزیراعظم شہبازشریف اور فیلڈمارشل عاصم منیر نے معزز مہمان کا استقبال کیا۔
نورخان ایئربیس پر معزز مہمان کو 21 توپوں کی سلامی دی گئی۔ مسلح افواج کے چاق وچوبند دستے نے معزز مہمان کو گارڈ آف آنر پیش کیا۔ اس موقع پر متحدہ عرب امارات اور پاکستان کے قومی ترانے بجائے گئے۔
وفاقی وزراء احسن اقبال، خواجہ آصف، محمداورنگزیب اور وفاقی وزیرمواصلات عبدالعلیم خان بھی نورخان ایئربیس پرموجود تھے، وزیراعظم شہبازشریف نےمعزز مہمان کو کابینہ ارکان کا تعارف کروایا۔
دیرنہ دوست کے استقبال کےلیے اسلام آباد کی اہم شاہراہوں اورعماتوں پر پاک یواے ای پرچموں اورقائدین کی تصاویر کی بہار ہے۔ راستوں کی خصوصی تزئین و آرائش، برقی قمقموں سے چراغاں کردیا گیا۔
صدر یو اے ای بننے کے بعد شیخ محمد بن زید کا یہ پہلا دورہ پاکستان ہے۔ جس میں وزراء اور اعلیٰ حکام پر مشتمل اعلیٰ سطح کا وفد بھی ان کے ہمراہ پہنچ گیاہے۔ معزز مہمان کا طیارہ پاکستانی فضاؤں میں داخل ہونے پر پاک فضائیہ کے شاہین ، لڑاکا جہازوں سے سلامی دے کر حفاظتی حصار میں لیا۔
