شمالی وزیرستان میں پاک فوج کی جانب سے انسداد منشیات آگاہی مہم کے تحت مختلف علاقوں میں ریلیاں نکالی گئیں۔
پاک فوج کے زیر اہتمام پورے شمالی وزیرستان میں منشیات سے متعلق آگاہی مہم چلائی گئی جس کا مقصد نوجوانوں کو منشیات سے متعلق شعور دلانا اور اس کے نقصانات سے آگاہ کرنا تھا۔
مختلف علاقوں میں نکالی گئی ریلیوں میں پاک فوج، سول انتظامیہ اور مقامی افراد نے کثیر تعداد میں شرکت کی جن میں ملکان، مشران، علماء اور طلباء شامل تھے۔ اس موقع پر نوجوانوں کو منشیات سے متعلق معلوماتی ویڈیوز بھی دکھائی گئیں۔
مہم کے دوران کھیلوں کی اہمیت اجاگر اور نوجوانوں کو کھیلوں کی طرف راغب کرنے کے لیے ایک کرکٹ میچ بھی منعقد کیا گیا۔ شمالی وزیرستان کے عمائدین اور مقامی افراد نے پاک فوج کے اس اقدام کی بھرپور پذیرائی کی۔
