سیکیورٹی فورسز نے خیبرپختونخوا میں دو الگ الگ کارروائیوں کے دوران فتنہ الخوارج سے تعلق رکھنے والے 9 دہشتگردوں کو ہلاک کردیا۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے خیبرپختونخوا میں فتنہ الخوارج کے خلاف خفیہ اطلاعات کی بنیاد پر دو الگ الگ کارروائیاں کیں۔ 19 دسمبر کو ڈیرہ اسماعیل خان میں شدید فائرنگ کے تبادلے کے دوران 4 خوارج مارے گئے۔آپریشن کے دوران دہشت گردوں کے ٹھکانوں کو مؤثر انداز میں نشانہ بنایا گیا۔
آئی ایس پی آر کے مطابق بنوں میں ایک اور کارروائی میں مزید 5 دہشت گردوں کو جہنم واصل کیا گیا۔ ہلاک ہونے والے خوارج سے اسلحہ اور گولہ بارود بھی برآمد ہوا، جو سیکیورٹی فورسز، قانون نافذ کرنے والے اداروں اور شہریوں کی ٹارگٹ کلنگ میں ملوث تھے۔
آئی ایس پی آر نے بتایا کہ علاقے میں کلیئرنس اور سینیٹائزیشن آپریشنز جاری ہیں، جبکہ سیکیورٹی فورسز اور قانون نافذ کرنے والے ادارے دہشت گردی کے مکمل خاتمے کے لیے پر عزم ہیں۔
