اسلام آباد میں وزیراعظم شہباز شریف کی زیر صدارت دانش یونیورسٹی کے بورڈ آف ٹرسٹیز کا اہم اجلاس منعقد ہوا۔ وزیراعظم نے بورڈ کے چیئرمین اور اراکین کو خوش آمدید کہتے ہوئے نیک خواہشات کا اظہار کیا اور کہا کہ ان کی کاوشیں علم کی روشنی پھیلانے میں اہم کردار ادا کریں گی۔
اجلاس سے خطاب کرتے ہوئے وزیراعظم نے ہدایت کی کہ دانش یونیورسٹی ٹیکنالوجی اور جدید علوم کے فروغ پر خصوصی توجہ مرکوز کرے۔ انہوں نے یونیورسٹی کی عمارت سادہ اور پروقار طرز پر تعمیر کرنے، اعلیٰ معیار کی تحقیق کو فروغ دینے اور بہترین فیکلٹی کی تعیناتی کے لیے جامع حکمت عملی بنانے کی ہدایات دیں۔ وزیراعظم نے کہا کہ یونیورسٹی کی تعمیر کے لیے اچھی شہرت اور تجربہ رکھنے والے کنٹریکٹرز کو پری کوالیفائی کیا جائے۔
وزیراعظم نے دانش یونیورسٹی میں طلبہ کے داخلے کے حوالے سے بھی واضح ہدایات جاری کرتے ہوئے گلگت بلتستان اور آزاد کشمیر کے لائق اور مستحق طلبہ کو خصوصی مواقع فراہم کرنے پر زور دیا۔ اس کے ساتھ ساتھ سرکاری اسکولوں میں دانش یونیورسٹی سے متعلق آگہی مہم شروع کرنے کی بھی ہدایت کی گئی۔
اجلاس کو بریفنگ میں بتایا گیا کہ دانش یونیورسٹی پراجیکٹ مینجمنٹ یونٹ قائم کیا جا چکا ہے جبکہ یونیورسٹی کا چارٹر وزارت قانون و انصاف سے منظور ہو چکا ہے، جسے حتمی منظوری کے لیے کابینہ اور پارلیمنٹ کو بھجوایا جائے گا۔ بریفنگ میں مزید بتایا گیا کہ دانش یونیورسٹی کے حوالے سے ملک بھر میں آؤٹ ریچ پروگرام شروع کیا جا رہا ہے اور ابتدائی طور پر عصری تقاضوں سے ہم آہنگ سینٹر آف ایکسیلینس قائم کیے جائیں گے۔
بریفنگ کے مطابق ملک بھر کے مستحق طلبہ کے لیے داخلوں سے قبل ٹریننگ کیمپس شروع کیے جائیں گے جبکہ یونیورسٹی کے تعلیمی وژن کے لیے بین الاقوامی شہرت یافتہ ماہرین تعلیم سے رابطے بھی کیے جا چکے ہیں۔
اجلاس میں وفاقی وزیر تعلیم و فنی تربیت ڈاکٹر خالد مقبول صدیقی، وفاقی وزیر قانون و انصاف اعظم نذیر تارڑ، وفاقی وزیر اقتصادی امور احد خان چیمہ، دانش یونیورسٹی کے بورڈ آف ٹرسٹیز کے چیئرمین و اراکین اور متعلقہ اعلیٰ سرکاری افسران نے شرکت کی۔
