پاور سیکٹرز کے گردشی قرض سے چھٹکارے کے حوالے سے اہم پیشرفت ہوئی ہے۔ حکومت نے پاور ہولڈنگ کمپنی لمیٹڈ کے قرض کی ادائیگی کر دی۔ وفاقی وزیر توانائی اویس لغاری نے سماجی رابطے کی ویب سائٹ پر بتایا پاور ہولڈنگ کمپنی کے 659 ارب 6 کروڑ روپے قرض ادا کردیا ہے۔
وزیر توانائی اویس لغاری نے سماجی رابطے کی ویب سائٹ ایکس کے ذریعے تصدیق کی کہ قرض کی ادائیگی کیپٹل مارکیٹ کے ذریعے کی گئی۔ سکوک ادائیگی پاکستان کی تاریخ میں ڈیٹ مارکیٹ کی سب سے بڑی ادائیگی ہے۔
اویس لغاری کے مطابق پاکستان انرجی سکوک کے 399 اعشاریہ 6 ارب روپے اور سینڈیکیٹڈ فنانسنگ سہولت میں 259 اعشاریہ 7 ارب روپے کی ادائیگی کی گئی۔ یہ ادائیگی ایک ہزار 225 ارب روپے کے گردشی قرض میں کمی کی جانب بڑا قدم ہے۔
اس سیٹلمنٹ نے نہ صرف پاکستان کی کیپیٹل مارکیٹ کی مضبوطی ثابت کر دی بلکہ اس سے اسلامی فنانسنگ نظام کی گہرائی پر سرمایہ کاروں کا اعتماد بھی ظاہر ہوتا ہے۔
