اسلام آباد ہائیکورٹ نے جسٹس طارق محمود جہانگیری کی وکالت کی ڈگری کا ریکارڈ ایچ ای سی کےذریعے کراچی یونیورسٹی سےطلب کرلیا۔ ڈگری ریکارڈ اور درخواست قابل سماعت ہونے کا جائزہ لینے کے بعد کارروائی آگے بڑھائی جائے گی۔
چیف جسٹس اسلام آباد ہائیکورٹ سرفراز ڈوگر اور جسٹس اعظم خان پر مشتمل ڈویژن بینچ نے جسٹس طارق محمود جہانگیری ڈگری کیس میں تحریری آرڈرجاری کردیا۔ عدالتی حکم میں کہا گیا کہ میرٹ پر جائے بغیرجسٹس طارق محمود جہانگیری کی ڈگری کا ریکارڈ طلب کر رہے ہیں۔ ہائر ایجوکیشن کمیشن کی مجاز اتھارٹی کراچی یونیورسٹی سے ڈگری کا ریکارڈ حاصل کرکے عدالت میں پیش کرے، ہائر ایجوکیشن کمیشن وکالت کی ڈگری کی تصدیق کے ساتھ ریکارڈ پیش کرے۔
عدالت نے کراچی یونیورسٹی سے حقائق کا علم رکھنے والے مجاز افسر کو طلب کیا ہے اور کہا عدالتی معاون درخواست قابلِ سماعت ہونے کے نکتے پر آئندہ سماعت پر معاونت کریں۔ ڈگری ریکارڈ اور درخواست قابلِ سماعت ہونے کا جائزہ لینے کے بعد کارروائی آگے بڑھائی جائے گی۔ کیس نو دسمبر کو دوبارہ سماعت کیلئے مقرر کیا گیا ہے۔
