کراچی پورٹ پر پاکستان کی پہلی عالمی معیار کی بنکرنگ سروس کا آغاز ہوگیا۔ وفاقی وزیر بحری امور کا کہنا ہے کہ اس سے نہ صرف شپنگ انڈسٹری کو سہولت ملے گی بلکہ ملک کو اربوں روپے کا قیمتی زرمبادلہ بھی حاصل ہوگا۔
جنید انوار چوہدری کے مطابق کراچی پورٹ اتھارٹی نے پہلا بنکرنگ لائسنس جاری کر دیا ہے۔ متعدد بین الاقوامی کمپنیاں بھی لائسنس کے حصول میں دلچسپی ظاہر کر رہی ہیں۔ بنکرنگ سروس سے کراچی پورٹ کی علاقائی مسابقت میں نمایاں اضافہ ہوگا۔
انہوں نے کہا کہ عالمی معیار کے فیول سپلائی سسٹم کی دستیابی سے نہ صرف غیر ملکی شپنگ لائنز کی آمد بڑھے گی بلکہ ملک کو قیمتی زرمبادلہ بھی حاصل ہوگا۔ بنکرنگ آپریشنز سے مرمت، سپلائیز اور میری ٹائم لاجسٹکس سے متعلق روزگار میں خاطر خواہ اضافہ ہوگا۔
جنید انوار چوہدری نے بتایا کہ کراچی پورٹ میں عالمی حفاظتی اور آپریشنل اسٹینڈرڈز نافذ کر دیئے گئے ہیں۔ ایندھن کے معیار، دستاویزات اور شفافیت پر عالمی اصولوں کی مکمل پابندی ہوگی۔
