سپریم کورٹ کی بیسمنٹ میں سلنڈر دھماکے سے عدالت عظمٰی کی عمارت لرز اٹھی۔ دھماکے سے 12 افراد زخمی ہوگئے۔
ذرائع کے مطابق دھماکہ سینٹرل اے سی کے مرمتی کام کے دوران ہوا۔ دھماکے کے بعد وکلا اور عدالتی عملہ عمارت سے باہر کھلی جگہ پر نکل آیا۔ دھماکے سے کورٹ نمبر 6 بھی شدید متاثر ہوئے۔
دھماکے سے پہلے جسٹس علی باقر نجفی اور جسٹس شہزاد ملک سماعت کررہے تھے۔ دھماکے کے بعد بم ڈسپوزل اسکواڈ سپریم کورٹ پہنچ گیا اور متاثرہ بلڈنگ کی مکمل اسکریننگ کی۔ آئی جی اسلام آباد بھی سپریم کورٹ پہنچ گئے اور متاثرہ جگہ کا معائنہ کیا۔
آئی جی اسلام آباد کا کہنا ہے کہ کینٹین میں کئی روز سے گیس کا لیکج ہورہا تھا، اے سی کی مرمت کے دوران دھماکا ہوا، ماہرین نے بھی کلیئر کر دیا ہے کہ گیس دھماکا ہوا۔
ان کا مزید کہنا تھا کہ سلنڈر دھماکے میں 12 افراد زخمی ہوئے، جن میں سے 3 پمز اور 9 افراد کو پولی کلینک اسپتال منتقل کیا گیا۔ زخمیوں میں دو افراد کی حالت تشویشناک ہے۔
