بنوں کے علاقے منڈان پارک کے قریب مسلح افراد نے ابابیل فورس کے جوانوں پر فائرنگ کردی، واقعے میں ایک جوان موقع پر شہید اور ایک زخمی ہوگیا، زخمی کو ابتدائی طبی امداد دینے کے بعد پشاور ریفر کردیا گیا، فرار ملزمان کی تلاش شروع کردی گئی۔
بنوں میں تھانہ منڈان کے علاقہ منڈان پارک کے قریب بنوں ککی روڈ پر نامعلوم موٹر سائیکل سواروں نے ابابیل فورس کے جوانوں نے فائرنگ کی، فائرنگ سے ایک جوان اقرار موقع پر جاں بحق ہوگیا جبکہ ان کا ساتھی شفیع الرحمن زخمی ہوا۔
واقعے کی اطلاع ملتے ہی پولیس کی بھاری نفری موقع پر پہنچ گئی اور جاں بحق اور زخمی اہلکاروں کو ڈسٹرکٹ ہیڈ کوارٹر اسپتال بنوں منتقل کردیا گیا۔
ریسکیو ذرائع کے مطابق زخمی کو اسپتال میں طبی امداد دینے کے بعد مزید علاج کیلئے پشاور روانہ کردیا گیا۔
پولیس نے مفرور ملزمان کی گرفتاری کیلئے تمام تھانوں کو سڑکوں پر ناکہ بندیاں کرنے کی ہدایت جاری کردی، علاقے میں سرچ آپریشن شروع کردی ہے۔
