آئی سی سی ویمنز ورلڈکپ کے دوسرے سیمی فائنل میں بھارت نے دفاعی چیمپئن آسٹریلیا کو پانچ وکٹوں سے شکست دے کر فائنل میں جگہ بنالی۔
ممبئی میں کھیلے گئے سنسنی خیز میچ میں آسٹریلیا نے پہلے بیٹنگ کرتے ہوئے آخری اوور میں 338 رنز بنائے۔ پوئبے لچ فیلڈ نے شاندار بیٹنگ کرتے ہوئے 17 چوکوں اور 3 چھکوں کی مدد سے 119 رنز بنائے، ایلیسی پیری نے 77 اور ایشلے گارڈنر نے 63 رنز کی اننگز کھیلی۔ بھارت کی جانب سے شری چرانی اور دپتی شرما نے دو، دو کھلاڑیوں کو آؤٹ کیا۔
ہدف کے تعاقب میں بھارتی ٹیم نے شاندار کھیل کا مظاہرہ کرتے ہوئے 339 رنز کا ہدف 49ویں اوور میں پانچ وکٹوں کے نقصان پر حاصل کرلیا۔ جمائما روڈریگز نے 127 رنز کی ناقابلِ شکست اننگز کھیلی، جس میں 14 چوکے شامل تھے۔ کپتان ہرمن پریت کور نے بھی 89 رنز کی اہم اننگز کھیلی۔
واضح رہے کہ آئی سی سی ویمنز ورلڈ کپ 2025 کا فائنل اتوار کو بھارت اور جنوبی افریقا کے درمیان کھیلا جائے گا۔
